Галоўнае статыстычнае ўпраўленне прагназуе, што да 2060 года насельніцтва Польшчы зменшыцца на 12,7% – палякаў стане меней на 4 млн. 800 тыс. жыхароў.
На сённяшні дзень Польшча налічвае прыкладна 37 мільёнаў 700 тысяч чалавек. У 2060 годзе лічба стане меншай за 33 мільёны жыхароў. Будзе працягвацца працэс старэння грамадства.
Колькасць людзей старэйшых за 65 гадоў у Польшчы павялічыцца на траціну, а колькасць людзей старэйшых за 80 гадоў – падвоіцца. Па гэтай прычыне чакаецца адмоўны натуральны рост, то бок колькасць памерлых будзе перавышаць колькасць народжаных. Польшчу чакае дэпапуляцыя – у 2060 годзе натуральны рост колькасці насельніцтва складзе мінус 233 800 – папярэджвае Галоўнае статыстычнае ўпраўленне.
Зусім іншыя прагнозы, напрыклад, для Вялікабрытаніі.
Нацыянальнае статыстычнае ўпраўленне Вялікабрытаніі апублікавала прагноз росту насельніцтва краіны на бліжэйшыя 15 гадоў.
Мяркуецца, што ў Вялікабрытаніі нараджальнасць дакладна перавысіць колькасць смерцяў і складзе больш за 540 тысяч.
Агульная колькасць насельніцтва з улікам прыбылых мігрантаў павялічыцца на больш чым 6 мільёнаў чалавек. Насельніцтва Вялікабрытаніі ў цяперашні час налічвае 67 мільёнаў чалавек.
яс