Эксперт па пытаннях бяспекі кандыдат навук Мацей Мільчаноўскі лічыць, што толькі маштабныя змены ў Крамлі маглі выратаваць жыццё Аляксею Навальнаму. Учора расійская служба выканання пакаранняў (ФСИН) паведаміла пра смерць апазіцыянера ў калоніі.
Мацей Мільчаноўскі ў эфіры Польскага радыё 24 заявіў, што з таго моманту, калі Навальны трапіў у турму, у яго было «песімістычнае бачанне» лёсу палітыка. На думку эксперта, выратаваць Аляксея Навальнага магла толькі змена ўсяго расійскага кіраўніцтва. «Таму што ён не павінен быў выйсці з гэтай турмы жывым», – сказаў госць PR24.
Мацей Мільчаноўскі падкрэсліў, што многія еўрапейцы не разумеюць, наколькі рэпрэсіўная і жорсткая расійская пенітэнцыярная сістэма.
- На маю думку, у Польшчы ды Еўропе не разумеюць, наколькі страшная сітуацыя ў расійскіх турмах. Вельмі часта я чую, навошта расіяне ідуць на фронт, маўляў, адсядзяць два гады ў турме, тады не згінуць на вайне. Людзі не разумеюць, што расійскую калонію нельга параўноўваць ні з чым у Еўропе. Там з людзьмі абыходзяцца горш, чым з жывёлай, і гэта мякка сказана. Тое, што там адбываецца, – гэта проста сістэматычнае знішчэнне людзей.
Інфармацыі з незалежных крыніц пра смерць Аляксея Навальнага пакуль няма. Сям'я апазіцыянера і яго паплечнікі заявілі, што, незалежна ад заключэння медычнай экспертызы аб прычынах смерці, гэта было палітычна матываванае забойства.
IAR/нг