Прэзідэнт Польшчы Караль Наўроцкі ў сваім допісе ў сацыяльных сетках пракаментаваў распрацаваны Вашынгтонам і Масквой мірны план адносна заканчэння вайны ва Украіне.
«Прапановы, якія з’яўляюцца ў дыскусіі пра заканчэнне расійскай вайны супраць Украіны, павінны ўлічваць той факт, што Расія — дзяржава, якая не выконвае ўмоў», — напісаў польскі лідар.
«Кожны мірны план, які мае на мэце завяршэнне вайны, развязанай Расійскай Федэрацыяй ва Украіне, павінен быць прыняты ў Кіеве. Менавіта Украіна стала ахвярай злачыннай агрэсіі Пуціна, і менавіта ўкраінцы — пры падтрымцы Злучаных Штатаў і краін ЕС — павінны мець вырашальны голас у мірных перамовах».
Караль Наўроцкі нагадаў, што стабільнасць Еўропы не можа будавацца за спінай тых, каго гэта найбольш датычыць:
«Усе рашэнні, якія датычаць міру і бяспекі ў Еўропе, могуць прымацца толькі з удзелам усіх зацікаўленых бакоў. Цаной міру ні ў якім выпадку не можа быць дасягненне стратэгічных мэтаў агрэсара. А агрэсарам была і застаецца Расійская Федэрацыя», — нагадаў прэзідэнт Польшчы.
Паводле інфармацыі партала Axios, амерыканскі праект гарантый бяспекі быў перададзены Украіне разам з мірным планам з 28 пунктаў. Згодна з дакументам, Кіеў мусіў бы абавязацца, у прыватнасці, да адмовы ад уступлення ў НАТА (адпаведная норма павінна быць замацаваная ў Канстытуцыі Украіны); абмежавання асабовага складу УС; перадачы Расіі часткі тэрыторыі.
Адначасова дакумент утрымлівае пункт, паводле якога «суверэнітэт Украіны будзе гарантаваны», а сама Украіна зможа далучыцца да Еўрапейскага Саюза.
эж