Сёння ў Латвіі будзе ўведзеная каменданцкая гадзіна. Улады згаданай краіны таксама прынялі рашэнне аб падаўжэнні надзвычайнага становішча. У снежні ўрад Латвіі пастанавіў, што надзвычайнае становішча будзе працягвацца да 11 студзеня. Аднак з-за нязменна вялікай колькасці заражэнняў каранавірусам латвійскія ўлады вырашылі падоўжыць яго да 7 лютага.
Акрамя таго, было вырашана аб увядзенні каменданцкай гадзіны, якая будзе дзейнічаць з сённяшняга дня да 4 студзеня, а таксама падчас праваслаўных Калядаў, то бок 8 -10 студзеня.
Падчас каменданцкай гадзіны з 22:00 да 5:00 раніцы жыхары Латвіі павінны заставацца дома, які можна будзе пакінуць толькі накіроўваючыся да працы.
Прэм'ер-міністр Латвіі Крыш’яніс Карыньш заявіў, што новыя абмежаванні ўводзяцца для таго, каб жыхары краіны не збіраліся на навагоднія вечарыны. Апошні раз каменданцкая гадзіна ў Латвіі была ўведзена ў 1934 годзе пасля дзяржаўнага перавароту, які прывёў да ўлады Карліса Улманіса.
Учора ў краіне былі пацверджаныя 838 новых выпадкаў каранавіруснай інфекцыі. З моманту ўспышкі пандэміі на COVID-19 захварэлі больш за 37 тысяч чалавек. Нагадваем, насельніцтва Латвіі складае каля двух мільёнаў чалавек.
аз