На міжнароднай канферэнцыі ў Батумі прэзідэнты Грузіі Саломе Зурабішвілі, Малдовы Мая Санду і Украіны Уладзімір Зяленскі падпісалі сумесную дэкларацыю.
«Мы пацвярджаем сваю непахісную адданасць працэсу нашай інтэграцыі ў Еўрапейскі Звяз і праводзім комплексныя рэформы для ўмацавання нашых дэмакратычных інстытутаў і прывядзення нашага заканадаўства ў адпаведнасць з ключавымі элементамі права ЕЗ» – гаворыцца ў дэкларацыі.
Паводле дакументу, перспектыва стаць часткай Еўрапейскага Звязу дае Украіне, Грузіі і Малдове магутны стымул для далейшых больш глыбокіх рэформаў. Краіны плануюць працягнуць супрацоўнічаць з інстытутамі ЕЗ, развіваць зону свабоднага гандлю і тым самым інтэгравацца ва ўнутраны рынак Супольнасці.
«У нашых краін ёсць шмат агульнага, але галоўнае – мы не хочам вяртацца ў мінулае. Мы гатовыя змагацца за нашу еўрапейскую будучыню. Мы ўзялі абавязацельства падтрымліваць адзін аднаго» – адзначыла гаспадыня саміту прэзідэнт Грузіі Саломэ Зурабішвілі.
У Батумскім дакуменце таксама гаворыцца пра тое, што Украіна, Грузія і Малдова маюць намер працягваць праграму «Усходняга партнёрства» і гатовыя вызначыць агульныя прыярытэты, каб узмацніць палітычны дыялог і прасоўванне галіновай інтэграцыі з ЕЗ, асабліва ў сферах транспарту, энергетыкі, лічбавых пераўтварэнняў, зялёнай эканомікі, юстыцыі і ўнутраных спраў, стратэгічных камунікацый і аховы здароўя.
Кіраўнік Еўрапейскай Рады Шарль Мішэль падтрымаў ідэю і паведаміў аб планах стварыць «беспрэцэдэнтны інвестыцыйны пакет «для трох краін на суму 2,3 мільярда еўра з патэнцыялам для мабілізацыі да 17 мільярдаў еўра ў выглядзе дзяржаўных і прыватных інвестыцый у рэгіёне».
pap/iar/эж