Падчас пасяджэння Рады Бяспекі ААН па справе канфлікту на польска-беларускай мяжы заходнія краіны асудзілі рэжым Лукашэнкі. Расійскі дыпламат не пагадзіўся з прынятай рэзалюцыяй і абвінаваціў яе аўтараў у «мазахісцкіх схільнасцях».
«У іх нейкія мазахісцкія схільнасці, таму што падымаюць перад намі гэтую сарамлівую для ЕС тэму і гэта вельмі смелае», – аргументаваў намеснік пастаяннага прадстаўніка Расіі пры ААН Дзмітрый Палянскі. Дыпламат таксама заявіў, што ні Расія, ні Беларусь не дапамагалі перакідаць мігрантаў да польскай мяжы.
У прынятай у чацвер рэзалюцыі члены ЕС, якія засядаюць у Радзе Бяспекі, ЗША, Вялікабрытанія, а таксама Албанія, якая неўзабаве стане непастаянным членам Савета Бяспекі, падкрэсліваюць, што Беларусь, кіруючыся палітычнымі меркаваннямі, падвяргае небяспецы жыццё і дабрабыт мігрантаў, якія сабраліся на мяжы.
«Мы заклікаем беларускія ўлады пакласці канец гэтай бесчалавечнай дзейнасці і не пагражаць людзям. Міжнародным арганізацыям трэба даць неадкладны і бесперашкодны доступ да мігрантаў, каб яны маглі аказваць ім гуманітарную дапамогу», – гаворыцца ў дакуменце.
Згаданы заклік накіраваны да Беларусі, нагадаў амбасадар Польшчы пры ААН Кшыштаф Шчэрскі(Krzysztof Szczerski):
-Гэта заклік да Беларусі гарантаваць гуманітарную дапамогу згаданым асобам. Мы ўсе згодныя – мігрантам на мяжы неабходная дапамога. Згаданая рэзалюцыя ўтрымлівае важную інфармацыю, што зараз гэтую дапамогу блакуе Беларусь. Кожны, хто патрабуе аказання дапамогі мігрантам на мяжы павінен разумець, што адрасатам гэтых заклікаў з’яўляецца Беларусь.
Аўтары рэзалюцыі, якая асуджае Беларусь, выказваюць салідарнасць з Польшчай і Літвой. Яны гатовыя распачаць дыскусію пра тое, як ім дапамагчы. Разам з тым яны лічаць мэтазгодным увесці санкцыі супраць тых, хто падтрымлівае дзеянні беларускага рэжыму, якія спрыяюць незаконнаму перасячэнню мяжы з Еўрасаюзам.
PAP/IAR/аз