Расійскае ваеннае камандаванне рэзка адрэагавала на заяву прэзідэнта Расіі Уладзіміра Пуціна аб спыненні агню, паведамляе амерыканскі Інстытут вывучэння вайны (ISW). У чацвер Уладзімір Пуцін загадаў Мінабароны абʼявіць аднабаковае спыненне агню ва Украіне на перыяд праваслаўнага Раства. Яно павінна дзейнічаць з учорашняга да сённяшняга дня. Гэтае рашэнне было дрэнна ўспрынятае ў Расіі.
Інстытут прыводзіць словы кіраўніка самаабвешчанай Данецкай народнай рэспублікі Дзяніса Пушыліна, які заявіў, што, нягледзячы на спыненне агню, расійскія войскі працягнуць адказваць на «правакацыі з боку ўкраінскіх войскаў». Паводле яго, строгае захаванне перамірʼя можа даць Украіне шанец палепшыць свае пазіцыі на крытычных участках фронту.
На думку аналітычнага цэнтра, заява, на самой справе, зʼяўляецца крытыкай рашэння расійскага прэзідэнта. Згаданае рашэнне раскрытыкавалі таксама расійскія блогеры.
Раней амерыканскія аналітыкі ацанілі, што абвешчанае Расіяй спыненне агню зʼяўляецца элементам інфармацыйнай вайны, які павінен даць расійскім войскам час для перагрупоўкі ўздоўж лініі фронту. Ужо ўчора з’явілася інфармацыя, што расіяне не выконваюць абвешчанага імі рэжыму спынення агню. Пра гэта, між іншым, паведамляюць польскія валанцёры, якія дапамагаюць параненым у Саледары на ўсходзе Украіны.
IAR/аз