Дарадца па нацыянальнай бяспецы ЗША: Выхад Расіі са збожжавага пагаднення прынясе велізарныя дыпламатычныя страты

Дарадца па нацыянальнай бяспецы ЗША Джэйк Саліван заявіў, што выхад Расіі з Чарнаморскага збожжавага пагаднення пацягне за сабой велізарныя дыпламатычныя страты ў будучыні.

Ілюстрацыйнае фота

Elena Larina/Shutterstock

У інтэрв'ю амерыканскаму тэлеканалу CBS ён таксама запэўніў, што ЗША гатовыя да любога сцэнару і цесна супрацоўнічаюць з украінскім бокам у гэтым плане.

Паводле Джэйка Салівана, калі расіяне сапраўды выйдуць з пагаднення, астатні свет скажа, што Расія адвярнулася ад таго, каб даць краінам поўдня – Афрыцы, Лацінскай Амэрыцы і Азіі – доступ да неабходнага харчавання па даступных цэнах. «Такім чынам, гэта выбар, які давядзецца зрабіць Уладзіміру Пуціну», – падкрэсліў ён.

Расія абвясціла, што не падаўжае дамову, тэрмін дзеяння якой заканчваецца сёння. Дамова была ўзгоднена ў ліпені мінулага года дзякуючы намаганням ААН і Турцыі ў адказ на блакаду Расіяй чарнаморскіх партоў. Гэтая блакада ўдарыла па краінах Афрыкі і Блізкага Усходу, якія былі асноўнымі імпарцёрамі ўкраінскага збожжа. Еўрасаюз і ААН заклікаюць Расію падоўжыць збожжавае пагадненне.

Дарадца Джо Байдэна дадаў, што рашэнне аб працягу вайны таксама будзе мець велізарныя выдаткі для Расіі. «З дапамогай санкцый мы будзем працягваць аказваць эканамічны ціск на Расію, а ўкраінцы – ваенны ціск», – сказаў ён у інтэрвʼю. «А пакуль мы будзем забяспечваць Украіне неабходную падтрымку столькі часу, колькі спатрэбіцца», – дадаў Саліван.

Па словах Джэйка Салівана, гэта пасыл саміту НАТА. «Мы сказалі, што будучыня Украіны ў НАТА. Мы гэта мелі на ўвазе. Гэта не падлягае абмеркаванню. Гэта тое, што цяпер абавязаліся выканаць кожна з 31 саюзнікаў», – падкрэсліў ён.

IAR / вх