«Запіс з геалакацыйнымі дадзенымі, апублікаваны 15 лютага, паказвае, што расійскія войскі нядаўна перамясціліся на паўднёвую ўскраіну коксахімічнага завода ў Аўдзееўцы. Яшчэ адзін запіс (...) паказвае, што расійскія войскі захапілі ўмацаваныя ўкраінскія пазіцыі на поўдзень ад Аўдзееўкі», – гаворыцца ў паведамленні ISW. Іншыя запісы паказваюць, што расіяне перарэзалі апошнюю дарогу ў Аўдзееўцы, якая злучае поўдзень і поўнач горада. У той жа час прадстаўнікі ўкраінскай арміі паведамілі пра рэзервовы матэрыяльна-тэхнічны шлях, які дазваляе забяспечваць войскі ва ўсходняй і паўднёвай Аўдзееўцы.
Па дадзеных ISW, «расійскія сілы могуць спыніць абыход некаторых украінскіх войскаў, калі ўкраінскія сілы не адыдуць або не будуць праводзіць эфектыўныя контратакі».
ISW нагадвае, што Аўдзееўка з'яўляецца важным пунктам абароны Украіны з пачатку баёў на Данбасе ў 2014 годзе. Расіяне спрабавалі ўзяць горад з пачатку ўварвання ў лютым 2022 года, у кастрычніку 2023 года яны пачалі масавы наступ. Аднак толькі ў апошні час расійскія войскі пачалі дамагацца тактычных поспехаў у гэтай мясцовасці.
Аўдзееўка дае расіянам абмежаваныя перспектывы далейшага прасоўвання, падкрэсліваюць аналітыкі – яе захоп не дасць «значнага аператыўнага прагрэсу», а толькі створыць умовы для «далейшых абмежаваных тактычных поспехаў».
«Патэнцыйны захоп Аўдзееўкі даў бы Крамлю перамогу на полі бою, якую можна было б прапагандаваць сярод айчыннай аўдыторыі перад прэзідэнцкімі выбарамі ў Расіі ў сакавіку 2024 года», – адзначае ISW. Ён прагназуе, што Уладзімір Пуцін паспрабуе падаць захоп горада як «значную перамогу, якая замацоўвае кантроль над акупаваным Данецкам».
Разам з тым камандуючы аператыўна-стратэгічнай групоўкай войскаў «Таўрыя» УСУ генерал Аляксандар Тарнаўскі паведаміў, што ў межах горада Аўдзееўка Данецкай вобласці на ўсходзе Украіны ідуць жорсткія баі з расійскімі войскамі, і сітуацыя хоць і складаная, але знаходзіцца пад кантролем украінскіх сілаў.
Са слоў Тарнаўскага, «абарончая аперацыя Аўдзееўкі працягваецца. Нашы вайскоўцы працягваюць знішчаць акупацыйнае войска і знішчаць сродкі і рэзервы праціўніка, якія кідаюцца ў бой без абмежаванняў».
Генерал падкрэсліў, што «каштоўны кожны кавалак украінскай зямлі, але найвышэйшай каштоўнасцю і прыярытэтам для нас зʼяўляецца захаванне жыццяў украінскіх вайскоўцаў».
У пятніцу Генштаб Узброеных сіл Украіны напісаў пра складаную сітуацыю ў раёне Аўдзееўкі.
PAP/вх