Незалежна ад таго, калі і як скончыцца вайна супраць Украіны, Расія не перастане быць пагрозай для Еўропы, лічыць камандуючы Узброенымі сіламі Фінляндыі генерал Янне Яакола. Мэта Крамля — шматразовае павелічэнне арміі, «гэтая трансфармацыя ўжо ідзе, і мы за ёй уважліва сочым», дадаў ён.
У рамках ваеннай рэформы Расія плануе стварыць замест брыгад чатыры-пяць дывізій, армейскі корпус і сілы падтрымкі. Перад нападам на Украіну ў памежных з Фінляндыяй раёнах было размешчана каля 20 тысяч расійскіх вайскоўцаў, чатыры брыгады ў гатоўнасці, нагадаў генерал.
Выступаючы на семінары па палітыцы бяспекі ў Хельсінкскім універсітэце, Яакола адзначыў, што Расія, нягледзячы на вайну супраць Украіны, значныя страты ў людзях і ваеннай тэхніцы, змагла выпрацаваць уласныя метады і стратэгіі дзеянняў, павялічыць абсталяванне і вытворчасць зброевай прамысловасці.
Паводле яго слоў, вопыт гэтай вайны паказвае, што выключна даручэння вядзення баявых дзеянняў толькі прафесійным вайскоўцам ужо недастаткова. «Адбылося вяртанне да традыцыйнай здольнасці і волі грамадства ў цэлым весці вайну. Гэта асабліва важна ва ўмовах працяглай вайны», — прызнаў Яакола. Для гэтага, прадоўжыў ён, неабходны «кадравы рэзерв і дзеючая мабілізацыйная сістэма».
У адрозненне ад многіх заходніх краін, Фінляндыя не адмяніла ўсеагульную вайсковую павіннасць пасля халоднай вайны; колькасць узброеных сіл Фінляндыі ў выпадку вайны складае 280 тысяч; рэзерв налічвае каля 870 тыс. чалавек.
ав