Палітык падкрэсліў важнасць захавання НАТА як моцнага саюзу з удзелам ЗША, а ў якасці найбліжэйшых палітычных саюзнікаў назваў «Брацтва Італіі», прэм'ер-міністра Джорджыю Мелоні і партыю «Права і справядлівасць» у Польшчы.
«Тое, як вы сябе паводзіце і дзейнічаеце, залежыць ад пасады, якую вы займаеце. Я цяпер лідар апазіцыі, кіраўнік партыі, і калі ў мяне не будзе моцнага голасу, мяне выключаць», — сказаў Сіміён, адказваючы на абвінавачванні ў тым, што як лідар партыі ён прыбірае канкурэнтаў і «не дзеліцца ўладай». Калі лідар радыкальна правага «Альянсу за Саюз румынаў» Джорджэ Сіміён стане прэзідэнтам, яму давядзецца кіраваць з кааліцыяй, сфарміраванай сацыял-дэмакратамі (PSD), нацыянальнымі лібераламі (PNL) і партыяй венгерскай меншасці (UDMR).
«Праўда ў тым, што не было ніякіх сур'ёзных доказаў таго, што замежнае ўмяшанне паўплывала на вынікі выбараў. У нас проста была эліта, якая баялася чалавека, які перамог, і таму выбары былі адмененыя», — мяркуе Сіміён.
У снежні Канстытуцыйны суд прызнаў несапраўдным першы тур выбараў, праведзеных у лістападзе, з-за злоўжыванняў і магчымага знешняга ўмяшання ў кампанію Кэліна Джарджэску. «Гэта дэмакратыя, і трэба паважаць людзей, бо калі вы ім не давяраеце, лічыце іх дурнымі і пад уплывам TikTok, а вы адзіны разумны і ведаеце, хто павінен кіраваць, то гэта выглядае як утрыманне ўлады», — сказаў Джорджэ Сіміён.
Румынскія ўлады анулявалі вынікі прэзідэнцкіх выбараў мінулай восенню на фоне абвінавачанняў у расійскім умяшанні ў перадвыбарчую кампанію. Прарасійскі нацыяналістычны кандыдат Кэлін Джорджэску у лістападзе нечакана заняў першае месца, атрымаўшы каля двух мільёнаў галасоў. У выніку яму было забаронена ўдзельнічаць у новых выбарах, а для паўторнага галасавання, якое праходзіць сёння, быў уведзены шэраг новых правілаў.
Нягледзячы на тое, што Сіміён, як ён сам неаднаразова падкрэсліваў, «больш умераны» за Джорджэску, традыцыйныя эліты, якія фарміруюць кіруючую кааліцыю, цяпер успрымаюць яго як галоўнага антысістэмнага кандыдата, папуліста і патэнцыйную пагрозу для цяперашніх вектараў румынскай палітыкі, у тым ліку на міжнароднай арэне.
Сіміён падкрэслівае, што выступае за тое, каб Румынія была ў моцным альянсе НАТА, а таксама за тое, каб застацца ў Еўрапейскім Саюзе. Аднак ён падкрэслівае, што супольнасць патрабуе аднаўлення, і румыны павінны заняць у ёй сваё законнае месца.
«З усяго спектру еўрапейскіх правых найбольш блізкія да нас італьянская партыя «Брацтва Італіі», Джорджыя Мелоні і польская партыя «Права і справядлівасць», таму мы далучыліся да сям'і Еўрапейскіх кансерватараў і рэфармістаў (ECR), а я — адзін з трох намеснікаў цяперашняга прэзідэнта Матэвуша Маравецкага», — сказаў Сімён.
Што да пытанняў бяспекі, то лідар AUR падтрымлівае захаванне «НАТА як моцнага альянсу на чале з ЗША з захаваннем існуючай інфраструктуры бяспекі».
«Калі я кажу, што Расія не ўяўляе пагрозы для НАТА, я маю на ўвазе, што гэта наймацнейшы альянс у гісторыі, членам якога мы з гонарам з'яўляемся, і таму ён не можа баяцца такой слабой арміі, як расійская», — тлумачыць ён.
Ён дадаў, што згодны з ацэнкай, што Расія, разам з Кітаем, Іранам і Паўночнай Карэяй, з'яўляецца галоўнай ваеннай пагрозай для Захаду.
«Найбольшай пагрозай і найбольшым задавальненнем для Расіі быў бы дэмантаж НАТА шляхам убівання расколу паміж ЗША і Еўропай і стварэння двух геапалітычных блокаў», — сказаў палітык. «Я лічу, што плаціць за сваю армію і сваю абарону — гэта здаровы сэнс. Нельга чакаць, што хтосьці будзе абараняць цябе бясплатна. Румынія, Польшча, краіны Балтыі і некаторыя іншыя краіны робяць гэта, але не ўсе члены НАТА», — дадаў Сіміён.
Сімён выступае супраць ваеннай дапамогі Украіне ў яе абарончай вайне з Расіяй, бо, як ён сцвярджае, «большасць румынаў гэтага не жадае».
«Гэтая вайна каштавала нам, Румыніі, шмат, і я не кажу, што ўкраінцы павінны здавацца, але калі ёсць хоць адна надзея на перамовы пад кіраўніцтвам Трампа, я малюся, каб яны былі паспяховымі, бо ніхто не хоча гэтай вайны», — сказаў ён, прызнаўшы, што Расія «паводзіць сябе падступна, спрабуючы ігнараваць амерыканскія заявы».
Паводле слоў Сіміёна, «немагчыма патрабаваць ад Украіны згоды аддаць тэрыторыі Расіі». Мы былі ў такой сітуацыі — паводле пакта Рыбентропа-Молатава мы аддалі Бесарабію, паўночную Букавіну, заяўляе Джорджэ Сіміён.
Адначасова Сіміён лічыць, што павінны быць уведзены «справядлівыя» камерцыйныя правілы транзіту ўкраінскай прадукцыі праз румынскі порт Канстанца, і дзеянні ўрада не павінны шкодзіць румынскім фермерам. Палітык таксама паўтарыў свае прэтэнзіі да Кіева адносна павагі да правоў румынскай меншасці ва Украіне, у першую чаргу наконт працы школ і цэркваў.
У нядзельных выбарах у Румыніі ўдзельнічаюць адзінаццаць кандыдатаў, а асноўнымі прэтэндэнтамі на другі тур (18 мая), акрамя Сіміёна, з'яўляюцца Крын Антонеску, якога падтрымлівае кіруючая кааліцыя, незалежны кандыдат, мэр Бухарэста Нікушор Дан і — хоць і з меншай падтрымкай у апытаннях — былы прэм'ер-міністр Віктар Понта.
Паводле PAP/вх