У Балівіі ўжо амаль месяц працягваюцца пратэсты і дарожныя блакады, якія паралізавалі жыццё ў краіне. Найбольш складаная сітуацыя — у сталіцы Ла-Пасе і суседнім Эль-Альта: там не хапае паліва, лекаў і часткі прадуктаў, а ў буйных шпіталях заканчваюцца запасы кіслароду.
Пратэстоўцы патрабуюць павышэння заробкаў, стабільных паставак паліва і адмовы ад часткі эканамічных рэформаў урада. Апошнімі днямі ў Ла-Пасе адбываліся сутыкненні дэманстрантаў з паліцыяй.
Прэзідэнт Балівіі Радрыга Пас заклікаў да дыялогу, але адначасова намякнуў на магчымасць увядзення надзвычайнага становішча.
— Той, хто шкодзіць іншаму балівійцу, не любіць радзіму. Для гэтага і існуе дыялог. У мяне ёсць канстытуцыйныя інструменты. Час заканчваецца.
Паводле ўладаў Балівіі, страты эканомікі ад пратэстаў ужо склалі каля 600 млн долараў. Урад абвінавачвае ў распальванні крызісу былога прэзідэнта Эва Маралеса, які хаваецца ад правасуддзя пасля абвінавачанняў у гандлі людзьмі і сэксуальных сувязях з непаўналетняй.
iar/эж