Польшча вяртаецца на карту Усходняй Антарктыды. З Варшавы ў найбліжэйшыя дні адправіцца спецыяльная навуковая экспедыцыя польскіх палярнікаў. Навукоўцы з Інстытута геафізікі Польскай акадэміі навук (РАN) едуць у раён Паўднёвага полюса, каб адкрыць польскую Даследчую станцыю імя Антона Баляслава Дабравольскага. Станцыя была зачынена больш за 40 гадоў таму.
У Антарктыдзе палярнікі будуць праводзіць даследаванні Зямлі. Кіраўнік экспедыцыі прафесар Марэк Левандоўскі падкрэсліў, што аазіс Бангера, дзе размешчаная польская станцыя, з'яўляецца адным з найлепшых месцаў для комплексных даследаванняў:
-Гэта ўнікальнае месца на зямлі, адкуль можна назіраць структуру ядра Зямлі, некранутую ні чалавекам, ні сейсмічнымі хвалямі, выкліканымі акіянам.
Станцыя імя Дабравольскага была пабудаваная савецкімі навукоўцамі і перададзеная Польскай Народнай Рэспубліцы ў 1959 годзе. З 1979 года там не праводзіліся даследаванні. Палярнікі хочуць запусціць яе зноўку і паставіць там аўтаматычную вымяральную ўстаноўку на сонечнай энергіі. Такім чынам станцыя будзе сама выконваць разлікі і перадаваць вынікі ў Варшаву.
Палярнікі будуць плыць да месцазнаходжання станцыі на караблі. Яны прыбудуць на станцыю праз два месяцы, у пачатку студзеня 2022 года. Навукоўцы будуць праводзіць даследаванні цягам наступных двух месяцаў, а вясной вернуцца ў Польшчу. Усе чацвёра палякі – вопытныя навукоўцы, у якіх за плячыма экспедыцыі ў падобныя кропкі планеты.
iar/эж