Еўрасаюз і Украіна падпісалі ў Бруселі пагадненне аб гарантыях бяспекі. Подпісы пад дакументам паставілі прэзідэнт Уладзімір Зяленскі, старшыня Еўракамісіі Урсула фон дэр Ляен і старшыня Еўрапейскага савета Шарль Мішэль.
Пагадненне з ЕС дапаўняе двухбаковыя дамовы, якія раней Украіна заключыла з паасобнымі краінамі Захаду, але ў адрозненне ад іх, не закранае дэталяў, датычных вайсковай падтрымкі.
ЕС запэўнівае, што пастаўкі сучаснага абсталявання ва Украіну будуць працягвацца зараз і ў будучыні ў выпадку чарговага нападу. Таксама Брусель аб’яцаў разгарнуць вучэбную місію, якая базуецца ў Польшчы, і да канца лета, павінна падрыхтаваць каля 60 тысяч жаўнераў, то бок у 4 разы больш, чым першапачаткова планавалася.
ЕС гатовы дапамагаць у развіцці абароннай прамысловасці Украіны і аб’яцае ёй фінансавую падтрымку. Пакуль гаворка ідзе пра 50 мільярдаў еўра да 2027 года.
Акрамя таго, у рамках створанага ў сакавіку Фонду дапамогі Украіне, сёлета ЕС выдзеліў 5 мільярдаў еўра на пераўзбраенне. Сродкі на падобным узроўні павінны пералічвацца ў фонд да 2027 года.
ЕС таксама прапануе Украіне супрацоўніцтва ў сферы разведкі ў барацьбе з кібератакамі і гібрыднай вайной, больш цесныя эканамічныя і гандлёвыя адносіны, а таксама падтрымку рэформаў на шляху ўступлення ў Еўрасаюз.
IAR/аз