З пачатку вайны ва Украіне ВМС Румыніі, Турцыі і Балгарыі выявілі больш за сотню дрэйфуючых марскіх мін.
Пытанне абмяркоўвалася падчас сустрэчы прадстаўнікоў ваенна-марскіх сіл гэтых краін. Дадатковая праблема ў тым, што міны пагражаюць таксама турыстам, якія адпачываюць на пляжах Чорнага мора.
У гэтым рэгіёне Чорнага мора некалькі тыдняў дзейнічае група, якая спецыялізуецца на абясшкоджванні марскіх мін. Сустрэча ваенна-марскіх камандзіраў Румыніі, Турцыі і Балгарыі ў румынскай Канстанцы мела на мэце, у тым ліку, падвесці першыя вынікі дзейнасці падраздзялення.
Намеснік флоту Румыніі Марыян Чубатару паведаміў, што з пачатку расійскай агрэсіі супраць Украіны былі выяўленыя 103 міны. Многія з іх небяспечна плавалі каля турыстычных пляжаў, а таксама вядомыя выпадкі, калі расійскія марскія міны знаходзілі на сушы. Кіраўнік міжнароднай групы MCM Black Sea Юсуф Карагулле заявіў, што з-за мін рух гандлёвых суднаў у гэтым рэгіёне вельмі ўскладнены і небяспечны.
Па словах вайскоўцаў, каб пазбегнуць рызыкі выбуху мін, неабходна яшчэ больш узмацніць маніторынг Чорнага мора.
яс/Пётр Пентка