Financial Times піша, што пасля пачатку ваеннай аперацыі ў Курскай вобласці РФ часткі УС Украіны, якія стрымліваюць расійскія войскі ў Данецкай вобласці, вярнуліся да нармавання снарадаў.
«Адзін з камандзіраў украінскай артылерыйскай брыгады ва ўсходняй Украіне сказаў Financial Times, што часткова прычынай расійскага наступу было тое, што Кіеў перакінуў свае абмежаваныя рэсурсы на поўнач. Яго падраздзяленне вярнулася да нармавання ўзбраення - упершыню пасля таго, як Кангрэс прыпыніў дапамогу ЗША Украіне — бо боепрыпасы былі пераразмеркаваны для ўварвання ў Курскую вобласць Расіі», — піша амерыканскае выданне.
Financial Times са спасылкай на чыноўнікаў, якія ўдзельнічалі ў аперацыі, таксама паведамляе, што для падтрымкі Курскай аперацыі Украіна перакінула з Данецкай і Харкаўскай абласцей больш за 10 тысяч вайскоўцаў, у тым ліку шмат элітных дэсантнікаў і механізаваных брыгад.
У прыватнасці, у Курскай аперацыі ўдзельнічалі не менш за 20 украінскіх падраздзяленняў, некаторыя з іх павінны былі стаць рэзервовымі сіламі для ўмацавання палос абароны і ратацыі войск на галоўных лініях фронту.
Таксама Financial Times са спасылкай на інфармацыю аналітыка з адкрытых крыніц Naalsio адзначае, што Украіна страціла ў Курскай аперацыі ўжо 51 адзінку ваеннай тэхнікі, у тым ліку нямецкія БМП Marder, амерыканскія Strykers і Himars, у той час як расіяне — 27 адзінак ваеннай тэхнікі.
Нагадаем, паводле заявы прэзідэнта Украіны У. Зяленскага, УСУ кантралююць 1250 квадратных кіламетраў тэрыторыі Расіі і 92 населеныя пункты.
pap/ez