У Латвіі ў Латгаліі ў некалькіх кіламетрах ад мяжы з Расіяй, узброеныя сілы пачалі звозіць тысячы цяжкіх каменных, жалезабетонных і металічных элементаў для будаўніцтва супрацьтанкавых і супрацьпяхотных загарод у рамках Балтыйскай лініі абароны, якая ўмацоўвае ўсходні фланг НАТА.
Раёны ўздоўж трасы A13 у Корсаўцы (лат. Karsava) і мясцовая чыгуначная станцыя, размешчаная ў некалькіх кіламетрах ад мяжы, уваходзяць у лік месцаў складзіравання блокаў і абарончых вузлоў, паведаміў у сераду тэлеканал LSM у рэпартажы з усходняй часткі Латвіі.
Падчас восеньскіх манеўраў «Namejs 2024» адной з задач для вайскоўцаў будзе расстаноўка перашкод у палявых умовах.
— Мы павінны быць гатовыя да таго, што ўмацаванне нашай мяжы - гэта доўгатэрміновая перспектыва, — заявіў кіраўнік Мінабароны Андрыс Спрудс.
Балтыйская абарончая лінія — сумесны міждзяржаўны праект Літвы, Латвіі і Эстоніі. Пагадненне аб яго рэалізацыі было падпісана міністрамі абароны трох балтыйскіх краін у Рызе ў пачатку гэтага года. Яе мэта — умацаванне ўсходняга флангу NATO, у тым ліку абарона ад магчымага ўварвання Расіі і Беларусі.
Балтыйская лінія ў будучыні павінна быць злучаная з праектам «Польскі шчыт Усход».
Паводле PAP/вх