Лідар венесуэльскай апазіцыі Эдмунда Гансалес Уруція прыбыў у нядзелю на борце самалёта ВПС Іспаніі ў аэрапорт Тарэхон-дэ-Ардос недалёка ад Мадрыда, паведаміла ў нядзелю Міністэрства замежных спраў Іспаніі. Міністр Хасэ Мануэль Альбарэс дадаў, што Гансалес папрасіў прытулку і атрымае яго.
Гансалес, кандыдат ад апазіцыі на ліпеньскіх прэзідэнцкіх выбарах у Венесуэле, быў аб'яўлены ў вышук судовай сістэмай краіны пасля таго, як тройчы не з'явіўся ў суд у сувязі з расследаваннем «актаў сабатажу выбараў».
У суботу віцэ-прэзідэнт Венесуэлы Дэлсі Радрыгес Гомес абвясціў, што ўрад у Каракасе вырашыў гарантаваць бяспечны выезд лідара апазіцыі з краіны, каб «дапамагчы аднавіць мір».
Як паведамляе Reuters, афіцыйныя асобы Іспаніі, у тым ліку былы прэм'ер-міністр Хасэ Луіс Радрыгес Сапатэра, на працягу тыдня вялі перамовы з уладамі Венесуэлы наконт ад'езду Гансалеса з краіны.
Былы дыпламат і апанент Нікаласа Мадура спачатку схаваўся ў галандскай, а затым іспанскай амбасадзе ў Каракасе. Іспанскі ўрад прызнаў, што Гансалес прыняў рашэнне пакінуць краіну самастойна, выкарыстоўваючы самалёт, накіраваны іспанскімі ўзброенымі сіламі. Ён прыбыў у Мадрыд у суправаджэнні жонкі.
Гансалес падаў прашэнне аб прадастаўленні прытулку, наш урад, вядома, дасць яму яго, сказаў міністр замежных спраў Іспаніі. «Урад Іспаніі адданы палітычным правам і фізічнай недатыкальнасці ўсіх венесуэльцаў», — напісаў Хасэ Мануэль Альбарэс на X.
Пасля выбараў 28 ліпеня рэжым абвясціў аб перамозе Нікаласа Мадура, але не прадставіў яе доказаў. Апазіцыя, аднак, апублікавала пратаколы выбарчых камісій, якія сведчаць аб высокай перамозе яе кандыдата Эдмунда Гансалеса Уруціа. У краіне ўспыхнулі пратэсты, жорстка падаўленыя ўладамі. Прынамсі 27 чалавек загінулі і больш за 2 тысячы былі затрыманыя.
ав