Польшча займае чацвёртае месца ў Еўропе па аб'ёме вытворчасці цацак. Іх прадаюць у асноўным на іншыя рынкі ЕС, але за апошні год рэзка вырас экспарт у Кітай - паведамляе Rzeczpospolita.
Выданне піша са спасылкай на дадзеныя Міжнароднага гандлёвага цэнтра, што летась кошт экспарту польскіх цацак склаў 2,6 мільярда еўра. На жаль, росту няма, экспарт упаў на 12% у параўнанні з 2023 годам, але лічбы неабходна разглядаць на фоне больш шырокай тэндэнцыі. Справа ў тым, што сусветны экспарт цацак у мінулым годзе панізіўся на 5%, а шэсць з дзесяці найбуйнейшых рынкаў зафіксавалі горшыя вынікі, чым год раней.
Асноўнымі пакупнікамі польскіх цацак з'яўляюцца Германія, Чэхія, Францыя і іншыя рынкі ЕС. Экспарт у ЗША павялічыўся прыкладна на 13% у параўнанні з мінулым годам (да 78 мільёнаў еўра). У сваю чаргу, рэкордны паказчык зафіксаваў рост экспарту ў Кітай – амаль у пяць разоў больш (392%). Аднак на гэты рынак усё яшчэ прыпадае адносна невялікая доля польскай вытворчасці, якая складае 23 мільёны еўра.
«Нягледзячы на ўмеранае зніжэнне экспарту ў 2024 годзе, польская прамысловасць па вытворчасці цацак захавала стабільнасць і моцныя пазіцыі на знешніх рынках. Зніжэнне паказчыкаў экспарту на 12% з'яўляецца вынікам глабальнага запавольвання, якое закранула большасць найбуйнейшых экспарцёраў свету. Сёння польскі сектар цацак — гэта галіна з адносна стабільным попытам і шырокім колам кліентаў», — адзначыў Радаслаў Ярэма, дырэктар польскага аддзялення кампаніі Akcenta.
нг