Прэс-сакратар Крамля Дзмітрый Пяскоў, каментуючы прысуджэнне Еўрапарламентам Аляксею Навальнаму прэміі Сахарава, у чацвер заявіў, што «ніхто не можа прымусіць» расійскі ўрад «праяўляць павагу да такіх рашэнняў».
Пяскоў запэўніў, што Расія паважае Еўрапарламент. Затым ён дадаў: «Але ніхто не можа прымусіць нас праяўляць павагу да падобных рашэнняў». Гэтыя рашэнні, на яго думку, прымаліся людзьмі, якія «проста не валодаюць надзейнай інфармацыяй».
Каментуючы ўзнагароду, прэс-сакратар Крамля назваў Навальнага «асуджаным, які адбывае пакаранне», імкнучыся не згадваць яго імя.
Ён таксама раскрытыкаваў фразу пра «бязмежную смеласць», якую ЕП ужыў у дачыненні да Навальнага. «Мы лічым, што сваімі рашэннямі Еўрапейскі парламент значна дэвальвуе значэнне гэтых слоў», – сказаў прадстаўнік Крамля.
Прэмія імя Сахарава «За свабоду думкі» штогод уручаецца Еўрапарламентам. Яна была заснаваная ў 1988 годзе ў гонар асоб і арганізацый, якія абараняюць правы чалавека і асноўныя свабоды. Назва была нададзена ў гонар савецкага фізіка і палітычнага дысідэнта Андрэя Сахарава.
ав