З нагоды Міжнароднага дня роднай мовы ад імя прэзідэнта Польшчы Караля Наўроцкага былі ўскладзены кветкі на магілу мовазнаўцы Самуэля Багуміла Ліндэ — аўтара «Слоўніка польскай мовы». Сёлета спаўняецца 255 гадоў з дня нараджэння навукоўца.
Свята адзначаецца 21 лютага па рашэнні UNESCO і закліканае абараняць моўную разнастайнасць і падтрымліваць нацыянальныя традыцыі.
Самуэль Багуміл Ліндэ — адна з ключавых постацей польскай гуманістыкі. Яго «Слоўнік польскай мовы», выдадзены ў 1807–1814 гадах, стаў першым аднамоўным нацыянальным слоўнікам. Выданне ўключае каля 60 тысяч артыкулаў з тлумачэннямі паходжання слоў і прыкладамі іх ужывання.
Слоўнік адыграў значную ролю ў захаванні польскай мовы ў перыяд падзелаў краіны. Магіла Ліндэ знаходзіцца на евангеліцка-аўгсбургскіх могілках у Варшаве.
pap/эж