Арміі свету хутка зразумеюць, што пакупка мільёнаў беспілотнікаў больш выгадная, чым набыццё авіяносца, заявіў Антон Магылівец, канструктар беспілотнікаў для Узброеных сіл Украіны.
«Беспілотнік з кіраваннем па валаконна-аптычным кабелі е мае перашкод і дазваляе перамяшчаць салдат далей ад лініі фронту. Там, дзе дзейнічае гэты беспілотнік, няма сутыкненняў пяхоты. Гэта значна зніжае выдаткі на нейтралізацыю праціўніка», – растлумачыў ён.
Антон Магылівец сустрэўся з прадстаўнікамі СМІ на адным з палігонаў пад Кіевам, каб прадэманстраваць магчымасці беспілотніка з кіраваннем па оптавалаконнай тэхналогіі. У цяперашні час такія франтавыя беспілотнікі звычайна маюць радыус дзеяння 10-15 кіламетраў, але ўжо ёсць апараты, якія могуць лятаць на адлегласць 50 км.
– Так, у нас ёсць асобная канструкцыя, якая сапраўды ляціць на 50 кіламетраў. Ён мае падвойныя сістэмы сувязі. Ён быў распрацаваны спецыяльна для паражэння цэляў глыбока ў тыле ворага, але выкарыстанне такога беспілотніка на полі бою вельмі дорага. Вось чаму яго выкарыстоўваюць кропкава, – патлумачыў канструктар.
Гаворачы пра звычайныя беспілотнікі з валаконна-аптычным кабелем, інжынер прадставіў разлікі, якія пацвярджаюць, што яны з'яўляюцца найбольш эфектыўным сродкам на полі бою сёння.
– Калі паспрабаваць падбіць танк самаходкай, то выкарыстаеш як мінімум пяць снарадаў. Кошт аднаго снарада, скажам, 2000 еўра. З пяццю адзінкамі ў нас ужо ёсць 10 000 еўра. Аднак узброены беспілотнік, які будзе значна больш упэўнена трапляць у цэль, каштуе менш за 1000 еўра, – падкрэсліў ён.
– Беспілотнікі таксама даюць магчымасць карэктаваць палёт, што робіць іх яшчэ лепшым сродкам барацьбы з ворагам. Гэта вельмі важна ў той момант, «калі цэль рухаецца», – адзначыў ён.
Магылевец выказаў думку, што краіны засяроджваюцца на традыцыйнай зброі, таму што гэта прыносіць карысць эканоміцы. «Завышаныя ваенныя бюджэты карысныя для эканомікі, бо вырабляецца зброя, зʼяўляецца дабаўленая вартасць і краіна развіваецца. Аднак гэта часовы эфект. Дронізацыя дае рэальную магчымасць знізіць выдаткі на знішчэнне і скараціць выдаткі на баявыя сродкі, якія ўсё роўна будуць знішчаны. І такім чынам – перанакіраваць астатнія фінансавыя рэсурсы на праекты, якія забяспечваюць большы эканамічны эфект», – растлумачыў ён.
Канструктар запэўніў, што – калі гаворка ідзе пра беспілотнікі – Украіна цяпер уваходзіць у лік вядучых краін, дзе яны выкарыстоўваюцца. – Калі вайна скончыцца, калі мы пераможам, у нас будзе прадукт, які будзе адным з найлепшых у свеце. Таму што нідзе больш няма такога шырокага спектру прымянення, як тут, – падкрэсліў ён.
«Украіна – калыска тэхналогій беспілотнікаў, якія зʼяўляюцца будучыняй поля бою, —растлумачыў ён. – Вопыт, атрыманы тут і цяпер, будзе выкарыстоўвацца ва ўсім свеце. І гэтыя разлікі, якія я прадставіў, пытанне аб тым, ці купляць адзін авіяносец, ці мільёны беспілотнікаў, у рэшце рэшт дойдуць да людзей. Яны гэта разлічаць і зразумеюць, што беспілотнікі могуць быць больш эфектыўнымі».
Нядаўна міністр абароны Украіны Рустэм Умераў абвясціў, што ў 2025 годзе яго краіна адправіць на фронт вайны з Расіяй больш за 4 мільёны беспілотнікаў, што дазволіць узмацніць атакі глыбока ўнутры варожай тэрыторыі.
Прэзідэнт Украіны Уладзімір Зяленскі заявіў у кулуарах саміту НАТА ў Гаазе, што яго краіна хацела б вырабляць 8 мільёнаў беспілотнікаў у год, але не мае на гэта сродкаў. Ён звярнуўся да заходніх партнёраў з просьбай павялічыць інвестыцыі ў сумесную вытворчасць узбраенняў.
PAP/вх