«Каралеўскі, то бок які?» — гэта слоган сёлетняй кампаніі «Бясплатны лістапад у каралеўскіх рэзідэнцыях». Традыцыйна наведвальнікі знакавых каралеўскіх рэзідэнцый — Каралеўскі замак у Варшаве, Музей палаца караля Яна III у Вілянаве, Каралеўскі музей Лазенкі ў Варшаве і Каралеўскі замак на Вавелі — змогуць карыстацца бясплатным уваходам на выставы і бясплатнымі музейнымі лекцыямі на працягу ўсяго лістапада.
Міністр культуры і нацыянальнай спадчыны Марта Цянкоўска адзначае, што для міністэрства важна павялічыць аўдыторыю культурных устаноў, таму сёлета на «Бясплатны лістапад» выдаткавана ажно 6,5 мільёнаў злотых.
- Мы імкнемся пашырыць доступ да культуры. Мы хочам, каб нашы культурныя ўстановы, музеі і выставы былі даступныя для ўсіх. Мы выступаем за тое, каб культура была агульна даступнай, і каб яна была ўсё больш даступнай для ўсіх палякаў. Мы хочам, каб гэты лістапад быў актыўным, каб мы маглі прадэманстраваць лепшае з таго, што могуць прапанаваць нашы ўстановы. Таму мы засяроджваемся не толькі на пастаянных выставах, але і на адукацыйных праграмах, спецыяльных падзеях.
Акрамя таго, што на працягу ўсяго лістапада можна бясплатна наведваць сталыя выставы ва ўсіх чатырох каралеўскіх рэзідэнцыях, то кожны чарговы ўікенд месяца будзе прысвечаны іншай рэзідэнцыі:
8-9 лістапада: Каралеўскі замак у Варшаве,
15-16 лістапада: Музей палаца караля Яна III у Вілянаве,
22-23 лістапада: Каралеўскі музей Лазенкі,
29-30 лістапада: Каралеўскі замак Вавель.
Першыя выходныя - 8-9 лістапада - у Каралеўскім замку ў Варшаве – гэта спецыяльныя экскурсіі, кажа дырэктар рэзідэнцыі прафесар Малгажата Аміляноўска. З увагі на набліжэнне Дня Незалежнасці мерапрыемствы будуць прысвечаны прэзідэнту Ігнацыю Масціцкаму, які жыў у Каралеўскім замку. Гэта таксама дасць магчымасць прадэманстраваць замак як важную рэзідэнцыю — ад княжацкай, праз каралеўскую і прэзідэнцкую, — дзе адбываліся ключавыя моманты польскай гісторыі.
- У нас запланаваны шырокі спектр мерапрыемстваў, такіх як экскурсіі па замку з гідам, ад падвалаў па дах, даследаванне закуткоў, якія звычайна недаступныя штодня. Яны не пакрытыя павуціннем, і там не засталося старых куфраў. Тым не менш, гэта даволі цікавыя месцы. Мы таксама прапануем розныя актыўнасці для дзяцей розных узроставых груп, тыпу размалёўкі і розныя майстар-класы. У гэтым годзе мы спланавалі так, што квіткі на бясплатныя экскурсіі па замку можна будзе ўзяць у касах у дзень наведвання, але таксама будзе магчымасць забраніраваць такія квіткі онлайн за тры дні да мерапрыемства, - гаворыць дырэктар рэзідэнцыі прафесар Малгажата Аміляноўска.
15-16 лістапада ў музеі Палаца караля Яна III у Вілянаве падчас выхадных «Каралеўская — што гэта такое? Яркая гісторыя» пройдуць майстар-класы і мерапрыемствы для розных узроставых груп. У музеі падкрэсліваюць, што палац заўсёды прапануе шырокі выбар мерапрыемстваў з элементам тэрапіі, вяртання да пачуццяў і сэнсарнага досведу.
Кіраўнік Аддзела адукацыі Паўліна Шуліст кажа, што наведвальнікі, якія прыбудуць у каралеўскую рэзідэнцыю ў гэтыя дні, здзейсняць падарожжа ў мінулае, і ў гэтым падарожжы іх будуць суправаджаць музейныя рэканструктары і музейныя педагогі:
- Гэта будзе падарожжа ў мінулае. Гэтыя людзі ўцеляцца ў ролі важных фігур для Вілянава. Будуць праведзены адукацыйныя мерапрыемствы, анімацыі і магчымасць пагуляць у гульню, што дазволіць вам адчуць сябе ў тых часах. Гэтыя мерапрыемствы будуць сканцэнтраваны на сэнсарных уражаннях, кулінарных майстар-класах, майстар-класах па каліграфіі, па прыдворных танцах і музычных занятках. Акрамя таго, што тычыцца праграмы «Бясплатны лістапад», палац будзе цалкам адкрыты для нашых гасцей з 10:00 да 16:00 штодня, акрамя аўторка. Парк таксама будзе адкрыты для нашых гасцей, і мы сардэчна запрашаем вас на часовую выставу, якая хутка адкрыецца: «Сабескія і Сцюарты, бляск і прывід кароны». Гэтая выстава таксама будзе адкрыта для нашых гасцей у рамках праграмы «Бясплатны лістапад».
22-23 лістапада – гэта ўікенд Каралеўскага музею ў Лазенках.
У гэтыя асаблівыя выходныя адбудзецца перфарматыўнае чытанне п'есы Станіслава Выспянскага «Лістападаўскай ночы», якая асабліва звязана з Каралеўскімі Лазенкамі, бо сем з дзесяці яе сцэн адбываюцца ў каралеўскай рэзідэнцыі.
Таксама адбудзецца двухдзённы семінар «Сцэнічная гісторыя «Лістападаўскай ночы», на якім будзе абмяркоўвацца драматургія Станіслава Выспянскага і яе найбольш выдатныя пастаноўкі. Сустрэча завершыцца прагулкай па слядах Выспянскага, які наведаў парк Лазенкі зімой 1898 года.
З аўторка па нядзелю Каралеўскі музей Лазенкі бясплатна адкрые для наведвальнікаў свае пастаянныя экспазіцыі.
11 лістапада, у гонар 107-й гадавіны аднаўлення незалежнасці Польшчы, у Каралеўскім музеі Лазенкі адбудзецца гістарычны пікнік пад назвай «Удзел кавалерыі ў аднаўленні незалежнасці».
29-30 лістапада выстава Каралеўскай зброевай палаты ў Каралеўскім замку Вавель –адкрыецца ў зусім новай версіі. Гісторыя рыцарства і зброі будзе даследавана ў сучаснай і займальнай форме. Выстава будзе адкрыта для наведвальнікаў бясплатна на працягу першых трох дзён пасля яе адкрыцця, расказала намеснік дырэктара Каралеўскага замка на Вавелі Марта Грачыньска:
- Абодва паверхі будуць адкрыты, каралеўскія апартаменты і пакоі, а таксама часовыя выставы. У гэтым годзе ў нас ёсць унікальная магчымасць, бо часовыя выставы ў Каралеўскім замку на Вавелі сканцэнтраваны на сучасным мастацтве. На сёлетняй выставе прадстаўлена адносна невялікая калекцыя сучаснага мастацтва, якая захоўваецца ў Каралеўскім замку на Вавелі на выставе: «Магчыма, нешта яшчэ?»
Дакладныя праграмы і бясплатныя квіткі неабходна шукаць на старонках усіх чатырох каралеўскіх рэзідэнцый.
слухайце аўдыё
ав