На вуліцы Стэфаніі Станюты ў Мінску зʼявіўся помнік сербскаму алігарху Срэтэну Карычу – аднаму з заснавальнікаў бізнес-імперыі BK Group, у склад якой уваходзіць будаўнічая кампанія Dana Holdings, перадае тэлеканал Белсат.
Помнік усталявалі ў закрытым катэджным пасёлку на беразе Цнянскага вадасховішча, дзе жывуць топ-менеджары кампаніі Dana Holdings і іх сваякі. Вуліца Стэфаніі Станюты знаходзіцца за шлагбаумам і кантрольна-прапускным пунктам і без дазволу туды трапіць немагчыма. Адпаведна і помнік Срэтэну Карычу могуць пабачыць толькі жыхары элітнага пасёлку.
Пра зʼяўленне помніка паведаміў у Facebook Багалюб Карыч – адзін з уладальнікаў Dana Holdings, брат Срэтэна. Сам Срэтэн памёр у 2017 годзе.
Браты Карычы – гэта сербскія алігархі, якія ў часы прэзідэнта Югаславіі Слабадана Мілошэвіча лічыліся самай магутнай фінансавай групай у краіне. СМІ называлі Карычаў часткай «сямʼі» Мілошэвіча – то бок асобамі набліжанымі да кіраўніка Югаславіі.
У канцы 2000-х Карычы пачалі развіваць бізнес у Беларусі. Цяпер кампанія Dana Holding з’яўляюцца аднымі з галоўных забудоўнікаў у Мінску.
СМІ неаднаразова пісалі пра сяброўства Карычаў з Лукашэнкам. У 2009 годзе па запрашэнні Карычаў кіраўнік Беларусі наведаў папулярны гарналыжны курорт Капаонік. Пазней Драгамір Карыч атрымаў паўнамоцтва ганаровага консулу Беларусі «за значны асабісты ўклад у развіццё гандлёва-эканамічных сувязяў» з Сербіяй. У 2014-м Драгамір суправаджаў Лукашэнка падчас ягонага візіту ў Сербію, а ў 2015-м быў запрошаны на інагурацыю Лукашэнкі ў Палацы Незалежнасці.
эж