Следчы камітэт Беларусі ўзбудзіў крымінальную справу па факце дзейнасці Праваабарончага цэнтру “Вясна”.
Крымінальная справа ўзбуджаная па арт. 342 КК (арганізацыя і актыўны ўдзел у групавых дзеяннях, якія груба парушаюць грамадскі парадак). У рамках справы сілавікі правялі вобшукі ў офісах рэгіянальных аддзяленняў і ў кватэрах сябраў арганізацыі, выклікаюць на допыты сябраў Рады ПЦ "Вясна". Адзін з іх - Дзмітрый Салаўёў з’яўляецца падазраваным і знаходзіцца пад падпіскай аб нявыезде. Напярэдадні гэтых падзей былі ўзятыя пад варту праваабаронцы і валанцёры ПЦ “Вясна” Марфа Рабкова, Андрэй Чапюк, Леанід Судаленка і Таццяна Ласіца.
Следства абвінавачвае ПЦ “Вясна” у нібыта фінансаванні ды іншым матэрыяльным забеспячэнні незаконных масавых мерапрыемстваў. Па дзяржаўным тэлебачанні вядзецца прапагандысцкая інфармацыйная кампанія, у якой ПЦ “Вясна” абвінавачваюць у тэрарыстычнай дзейнасці.
У сувязі з гэтай справа, Праваабарончы цэнтр “Вясна” заявіў, што арганізацыя з’яўляецца добраахвотным аб’яднаннем грамадзян, якія дзейнічаюць у адпаведнасці з Дэкларацыяй аб правах чалавека ААН, якая гарантуе кожнаму права індывідуальна альбо ў групе абараняць правы іншых. Дадзеная дзейнасць цалкам адпавядае Канстытуцыі Беларусі і павінна быць гарантаваная з боку дзяржавы.
Арганізацыя заявіла таксама, што ніколі не з’яўляўся арганізатарам якіх бы то не было гвалтоўных дзеянняў і заўсёды падтрымлівала мірную рэалізацыю грамадзянскіх і палітычных свабод. У бягучай сітуацыі вострага крызісу з правамі чалавека ПЦ “Вясна” вядзе дзейнасць па аказанні дапамогі ахвярам палітычных рэпрэсій і масавых парушэнняў правоў чалавека.
Прадстаўнікі арганізацыі патрабуюць ад уладаў Беларусі спыніць крымінальны пераслед ПЦ “Вясна”, вызваліць з-пад варты затрыманых праваабаронцаў, спыніць арышты праваабаронцаў у Беларусі ды гарантаваць ажыццяўленне любой законнай праваабарончай дзейнасці.
юл