Агенцтва Standard & Poor’s ацаніла рызыкі Беларусі ад эканамічных санкцый

Рэйтынгавае агенцтва лічыць, што рост ВУП Беларусі ў 2021 годзе складзе 0,5%.

Zdjęcie ilustracyjne.

manine99/Shutterstock

Standard & Poor’s (S & P) пацвердзіла доўгатэрміновыя і кароткатэрміновыя суверэнныя крэдытныя рэйтынгі Беларусі ў замежнай і нацыянальнай валюце на ўзроўні «В» з негатыўным прагнозам, паведамляе «Радыё Свабода».

«Санкцыі Еўразвязу, уведзеныя супраць Беларусі 24 чэрвеня, наўрад ці акажуць яшчэ немінучы ціск на стан плацежнага балансу краіны або здольнасць ураду абслугоўваць доўг», – гаворыцца ў прэс-рэлізе агенцтва.

Пры гэтым адзначаецца неакрэсленасць перспектываў беларускай эканомікі на фоне палітычнага крызісу, далейшага ўзмацнення жорсткасці санкцый і росту патрэбы ў дапамозе з боку Расіі.

Прагноз рэйтынгу пакінулі негатыўным, бо эксперты бачаць рызыку ўплыву санкцый і палітычнага крызісу на эканоміку, плацежны баланс і бюджэтныя паказнікі. Яны таксама прагназуюць пагрозу стабільнасці банкаўскай сістэмы, бо падтрымка Масквы можа аказацца менш надзейнай. Рэйтынг можа панізіцца, калі ўплыў санкцый акажацца больш істотным, а Расія не прадэманструе гатовасці падтрымаць Лукашэнку ў дастатковых аб’ёмах.

Ацэньваючы ўплыў санкцый на плацежны баланс Беларусі, агенцтва лічыць, што яны акажуць толькі ўмераны ціск. Сярод аргументаў згадваецца адсутнасць у санкцыйным пераліку шэрагу калійных пазіцый. У цэлым зніжэнне даходаў ад экспарту S & P ацаніла ў 500-700 млн долараў. Згадваецца, што пад санкцыі трапляюць толькі новыя кантракты, а сам ЕЗ не з'яўляецца асноўным спажыўцом беларускага калію.

Рэйтынгавае агенцтва лічыць, што рост ВУП Беларусі ў 2021 годзе складзе 0,5%. Аднак пры гэтым падкрэсліваецца высокая ступень няпэўнасці прагнозаў.

эж