Журналістка папрасіла кампетэнтныя органы правесці праверку па фактах катаванняў на Акрэсціна. Кацярына Карпіцкая з 14 жніўня па 13 верасня ўтрымлівалася ў ІЧУ на Акрэсціна. За месяц там яна падхапіла некалькі хвароб. «Я на свае вочы ўбачыла, што людзей там працягваюць катаваць, парушаючы ўсе існыя правілы ўтрымання адміністрацыйна арыштаваных (маўчу ўжо пра Міжнародны пакт аб грамадзянскіх і палітычных правах)», – кажа дзяўчына.
Журналістка пералічае: ні разу не патрапіла ні ў душ, ні на шпацыр, у двухмясцовай камеры ўтрымлівалася ад 8 да 13 чалавек, спала на голай падлозе ў халодных камерах, не атрымлівала перадач, лістоў і цёплага адзення, захварэла на каранавірус і не атрымлівала лекі, пазбаўлялася сну.
Скаргі на ўмовы ўтрымання на Акрэсціна былі накіраваныя адразу ў некалькі інстанцый: у Генеральную пракуратуру, Мінскую гарадскую пракуратуру, у Дэпартамент фінансаў і тылу МУС РБ, у Рэспубліканскі цэнтр гігіены і эпідэміялогіі і ў ГУУС Мінгарвыканкама.
У Дэпартаменце фінансаў і тылу МУС адказалі лаканічна: «Факты не знайшлі пацверджання». Іншыя структуры, чакана, паперакідвалі зварот паміж сабой і адфутболілі адказнасць за разгляд скаргі непасрэдна на ГУУС Мінгарвыканкама. Тыя ж, «правёўшы» праверку самі ў сябе, таксама парушэнняў не знайшлі.
ав/Наша Ніва