Грамадзяне Беларусі, апынуўшыся перад выбарам паміж самацэнзурай і пазбаўленнем волі, часта вырашаюць пакінуць краіну, заявіла спецдакладчык ААН па сітуацыі з правамі чалавека ў Беларусі Анаіс Марэн.
Рэжым Лукашэнкі «зачышчае грамадзянскую супольнасць: няўрадавыя арганізацыі, юрыстаў, лекараў, навукоўцаў, журналістаў і ўсіх непажаданых уладам», заявіла Марэн на онлайн-канферэнцыі.
Марэн звярнула ўвагу на тое, што беларускія ўлады два гады не накіроўвалі сваіх прадстаўнікоў на прэзентацыі падрыхтаваных ёю і яе камандай дакладаў. «У рэшце рэшт, мы чакаем дыялогу, а апошнім часам гэта выглядае як маналог», – патлумачыла яна. І адзначыла, што ў сувязі з пагаршэннем сітуацыі ў Беларусі яе каманда вырашыла захаваць ананімнасць сваіх суразмоўцаў.
Падчас канферэнцыі яна ўзгадала сведчанні жанчын аб згвалтаваннях, якія здзяйснялі расійскія вайскоўцы, дыслакаваныя ў Беларусі. «На жаль, мы не можам праверыць гэтыя паведамленні (Мінск адмаўляе ёй ва ўездзе ў краіну – рэд.), але гэтыя жанчыны не могуць патрабаваць справядлівасці ў рамках беларускай прававой сістэмы», – сказала яна.
Гаворачы аб рэкамендацыях краінам знаходжання беларусаў, якія ўцякаюць ад рэжыму Лукашэнкі, яна рэкамендавала «інвеставаць у падрыхтоўку псіхолагаў, якія працуюць па-беларуску, каб у далейшым дапамагаць уцекачам, якія застануцца ў гэтых краінах».
PAP/нг