Вайсковы камісарыят Віцебска распаўсюдзіў паведамленне з просьбай да ваеннаабавязаных грамадзянаў, якія не прайшлі зверку дадзеных, у любы зручны час, у тым ліку ў выходныя і святочныя дні, з'явіцца ў гарадскі ваенны камісарыят. Грамадзян супакойваюць, што зверка ваеннаабавязаных не зʼяўляецца мабілізацыяй або мабілізацыйнымі зборамі.
Аднак усё больш трывожных сігналаў паступае з розных рэгіёнаў краіны. Па прыбыцці ў ваенкаматы некаторыя атрымліваюць позву на вайсковыя «зборы». Прапаршчыкам і старшынам прапануюць перавучвацца ў лейтэнанты. Генералы ездзяць па заводах і рыхтуюць людзей да вайны.
У Міністэрстве абароны сцвярджаюць, што праводзіцца планавая праверка ваеннаабавязаных па даручэнні кіраўніка краіны. Усё гэта праходзіць на фоне ўдзелу рэжыма Лукашэнкі ў вайне з Украінай, выкарыстанні тэрыторыі Беларусі расійскім войскам, а таксама разгортванні супольнай беларуска-расійскай групоўкі войскаў.
Для Беларускай службы Польскага радыё Святаслаў Бруйко, Віцебск