Адпрацаванае ядзернае паліва з БелАЭС будуць вывозіць у Расію з наступным вяртаннем у Беларусь прадуктаў перапрацоўкі, паведамілі ў Міністэрстве энергетыкі.
«Зыходзячы з вынікаў праведзеных даследаванняў і ацэнак, быў прыняты варыянт з перапрацоўкі ў Расійскай Федэрацыі адпрацаванага ядзернага паліва з вяртаннем у Беларусь адходаў перапрацоўкі, уключана з рэчывамі, якія ўтрымліваюць радыяцыйны цэзій і стронцый», – расказала на брыфінгу начальнік упраўлення тэхнічнага суправаджэння АЭС ДВА «Белэнерга» Надзея Зданевіч.
Паводле чыноўніцы, гэты падыход быў пакладзены ў аснову пагаднення Беларусі і Расіі аб абыходжанні з ядзерным палівам. Цяпер вядзецца актыўная работа па рэалізацыі палажэнняў дакумента. «Распрацаваны праект пастановы Рады міністраў, якім прадугледжваецца ўстанаўленне ўпаўнаважаных арганізацый у галіне абыходжання з радыеактыўнымі адходамі (РАА), якія мы будзем атрымліваць пасля перапрацоўкі ў Расіі, і парадак прыняцця рашэнняў Міністэрства энергетыкі аб вывазе адпрацаванага ядзернага паліва на перапрацоўку ў Расію», – адзначыла яна.
Крыніца: Зеркало