Для Аляксандры Семянюк на платформе Bysol абʼяўлены збор сродкаў.
«Кожнае затрыманне мамы, шматлікія суды, ператрусы і турэмны тэрмін, былі стрэсам і велізарным перажываннем для мяне і маіх дзяцей. Але тое, як трымалася і трымаецца мая мама ў 67 гадоў, нягледзячы на ўсе катаванні і пераследы ў турме – для мяне прыклад велізарнай стойкасці, сілы нязломнага характару і жыццялюбства», – піша Аляксандра Семянюк.
«Я рабіла ўсё магчымае, каб дапамагаць маці за кратамі і інфармаваць грамадства пра тое, што з ёй там адбываецца», – распавядае Аляксандра.
23 студзеня гэтага года да яе прыйшлі сілавікі. У доме адбыўся вобшук, нешта канфіскавалі, Аляксандру адвезлі на шасцігадзінны допыт у КДБ.
Пасля допыту жанчыну адвезлі ў Следчы камітэт і выставілі абвінавачванне па арт. 361 КК РБ (заклікі да мер абмежавальнага характару (санкцый), іншых дзеянняў, накіраваных на прычыненне шкоды нацыянальнай бяспецы Рэспублікі Беларусь).
Нагадаем, у студзені больш чым да 200 чалавек сілавікі прыйшлі з пытаннямі наконт дапамогі рэпрэсаваным.
Аляксандру Семянюк таксама пераследавалі за дапамогу, атрыманую ад арганізацыі DissidentBy. Яе пасадзілі на трое сутак у ІЧУ ў жахлівыя ўмовы, а пасля выхаду з турмы жанчына вырашыла з'ехаць з краіны, каб не засталіся без апекі трое дзяцей, якіх Аляксандра гадуе адна.
З мінімальнай колькасцю грошай і рэчаў у красавіку 2024 года сямʼя выехала з Беларусі і цяпер пачынае новае жыццё ў Польшчы. Аляксандра Семянюк з дзецьмі знаходзіцца ў шэлтары для беларусаў і мае моцную патрэбу ў фінансавай падтрымцы.
«Нам трэба зняць жыллё, з магчымасцю аплаты на некалькі месяцаў наперад. Набыць рэчы і прадметы першай неабходнасці, бо няма нават элементарных рэчаў – не так шмат мы змаглі прывезці ў заплечніках. Пакуль мы тут адаптуемся, легалізуемся – без сяброў і працы я не разумею, чым і як я буду карміць сваіх дзяцей. Таму я шукаю дапамогу ў кожнага, хто можа зразумець і падзяліць маё становішча і стан», – піша жанчына.
Падтрымаць Аляксандру Семянюк і яе дзяцей можна па спасылцы.
Маці Аляксандры Алену Гнаўк, 67-гадовую пенсіянерку з Пружаншчыны, з 2020 года судзілі ўжо чатыры разы па палітычных крымінальных справах. Цяпер да яе вызвалення засталося прыкладна два гады. Адбывае тэрмін жанчына ў калоніі № 24 у Зарэччы Рэчыцкага раёне.
Па інфармацыі праваабаронцаў, Алене Гнаўк павінны былі зрабіць аперацыю на кішэчніку, бо там зʼявіліся новаўтварэнні, але ці зрабілі – невядома. Увогуле з ёй няма сувязі ўжо амаль паўгода.
вх