Беларуская лідарка правяла перамовы з міністрам унутраных спраў Літвы Уладзіславам Кандратовічам. Размова прайшла на беларускай мове, што падкрэсліла добразычлівае стаўленне літоўскага палітыка да беларускага народа. У сустрэчы таксама ўзялі ўдзел кіраўніца дэпартаменту Міграцыі Эвэліна Гудзінскайце і амбасадарка па асаблівых даручэннях Аста Андрыяўскене.
Міністр адзначыў: Літва працягне падтрымліваць беларусаў. Ціханоўская ў адказ падзякавала за паслядоўную падтрымку і выказала ўдзячнасць за рашэнні, якія палягчаюць жыццё беларусаў у Літве.
Падчас сустрэчы бакі ўзнялі такія ключавыя пытанні для беларусаў:
– праблемы пры атрыманні ЧВЖ і дакументаў. Беларуская лідарка прапанавала стварыць рабочую групу для аператыўнага вырашэння праблемаў. Міністар запэўніў, што кожны кейс разглядаецца індывідуальна, і кожнае рашэнне можа быць абскарджана праз суд.
– тэрміны замены аўтамабільных нумароў: Ціханоўская звярнулася з просьбай працягнуць іх.
Літоўскі палітык адзначыў, што «за год мяжу з Беларуссю перасякаюць каля 1,5 мільёнаў разоў і для Літвы вельмі важнае пытанне бяспекі», і запэўніў, што памежныя пераходы застаюцца адкрытыя для пасажырскага злучэння.
Крыніца: Офіс Святланы Ціханоўскай/юл