Беларускія медыкі ў выгнанні запускаюць праект «Раёнка» — анлайн-паліклініку. Яна разлічаная на ўразлівыя групы — палітвязняў, шматдзетныя сем'і і бацькоў-адзіночак, а таксама людзей з невялікіх гарадоў і вёсак без доступу да якаснай медыцынскай дапамогі. Пра праект расказаў Станіслаў Салавей, намеснік прадстаўніка АПК па сацыяльнай палітыцы на канферэнцыі «Новая Беларусь». Пра гэта паведамляе reform.news.
— «Раёнка» — гэта, па сутнасці, анлайн-паліклініка, разлічаная на ўразлівыя групы. Пад імі мы маем на ўвазе не толькі палітвязняў, шматдзетныя семʼі і бацькоў-адзіночак. Мы таксама адносім да іх людзей, якія жывуць за межамі буйных гарадоў — у невялікіх гарадах і вёсках, дзе часта ўзнікаюць праблемы з даступнасцю і якасцю медыцынскай дапамогі, — растлумачыў Салавей.
У «Раёнцы» будуць працаваць толькі медыкі, якія зʼехалі з Беларусі. Першых пацыентаў мяркуюць прымаць у наступным месяцы.
Адмысловая ўвага надаецца бяспецы як лекараў, так і пацыентаў.
— І пацыенты, і лекары будуць ананімнымі. Іх верыфікацыяй будуць займацца розныя людзі: медыкаў будуць верыфікаваць адны спецыялісты, а пацыентаў, якія знаходзяцца ў Беларусі, — іншыя. Гэта робіцца дзеля іх абароны, таму што мы разумеем: дзяржава вельмі нервова рэагуе, калі мы спрабуем паказаць, што з медыцынскай дапамогай у краіне нешта не так, — распавёў Салавей.
вс