Памёр палітык і грамадскі дзеяч Аляксандр Мілінкевіч, былы кандыдат у прэзідэнты Беларусі

Апошнія гады палітык быў вымушаны жыць за межамі Беларусі. У лістападзе 2025 года ён перанёс складаную аперацыю.

Памёр Аляксандр Мілінкевіч.

Фота: Еўрарадыё

Раніцай 11 жніўня памёр беларускі палітык Аляксандр Мілінкевіч — дэмакратычны кандыдат на прэзідэнцкіх выбарах 2006 года. Пра яго смерць паведаміла сям’я. Мілінкевічу было 79 гадоў.

У 1990-я гады Аляксандр Мілінкевіч працаваў намеснікам старшыні Гродзенскага гарвыканкама. На прэзідэнцкіх выбарах 2001 года ён узначальваў перадвыбарчы штаб Сямёна Домаша.

У 2005 годзе Мілінкевіча вылучылі адзіным кандыдатам ад дэмакратычных сіл на прэзідэнцкія выбары 2006 года. Паводле афіцыйных вынікаў, ён атрымаў каля 6 працэнтаў галасоў і заняў другое месца пасля Аляксандра Лукашэнкі. Пасля выбараў, у 2006 годзе, Мілінкевіч узначаліў рух «За Свабоду» і кіраваў ім да 2016 года.

Апошнія гады палітык быў вымушаны жыць за межамі Беларусі. У лістападзе 2025 года ён перанёс складаную аперацыю і працяглы час знаходзіўся ў цяжкім стане.

Пра смерць Мілінкевіча выказалася Святлана Ціханоўская. Яна назвала яго чалавекам «выключнай годнасці, светлай душы і светлага розуму» і адзначыла, што ён быў для яе надзейнай апорай і чалавекам, да думкі якога яна заўсёды прыслухоўвалася.

Паводле Ціханоўскай, Мілінкевіч быў адным з самых яскравых палітыкаў свайго часу. Яна нагадала, што ў 2006 годзе ён здолеў аб’яднаць розныя дэмакратычныя партыі і рухі, каб выкарыстаць прэзідэнцкія выбары для мабілізацыі нацыянальных сіл.

Ціханоўская таксама падкрэсліла яго адданасць Беларусі, беларускай мове і культуры, назваўшы Мілінкевіча чалавекам, які натхняў тых, хто працаваў побач з ім.

нг