Камісія па замежных справах і пытаннях Еўрапейскага Саюзу польскага Сенату (вышэйшай палаты парламенту) прыняла рэзалюцыю аб агрэсіўных дзеяннях Расійскай Федэрацыі ў дачыненні Украіны.
У ёй камісія выказвае «глыбокую павагу да ўкраінскага народа, які абараняе сваю незалежнасць». У той жа час сцвярджаецца, што ўкраінскі народ мае поўнае права на самастанаўленне, уключаючы выбар стратэгічнай арыентацыі і хаўруснікаў. У рэзалюцыі, якую зачытаў старшыня камісіі, сенатар Грамадзянскай кааліцыі Богдан Кліх, гучыць таксама крытыка дзеянняў Расійскай Федэрацыі.
- Камісія замежных спраў і пытанняў Еўрапейскага Саюзу мяркуе, што дзеянні Расіі нясуць пагрозу бяспецы на нашым кантыненце. Гэта спроба парушыць правіла стабільнасці межаў у Еўропе. Яна заклікае ўлады РФ адмовіцца ад далейшай эскалацыі і дэстабілізацыі ў рэгіёне.
У прынятай рэзалюцыі камісія звяртаецца таксама да лідараў дзяржаваў-членаў НАТА пачаць кансультацыі згодна з 4-ым артыкулам Вашынгтонскага трактату. Толькі цвёрдая пазіцыя краін ЕС і НАТА можа прадухіліць далейшую эскалацыю і вайну.
У панядзелак кіраўнік замежных спраў ЕС Жазеп Барэль паведаміў, што каля мяжы з Украінай і ў Крыме сканцэнтравана каля 150 тыс. расійскіх салдат.
ІАР ПР/нг
на здымку - галасаванне ў Сенаце