Спецслужбы Польшчы: З Беларусі вывезена частка мігрантаў з Блізкага Усходу

Адначасова на мяжы адбылося ўварванне ўзброеных сілавікоў Лукашэнкі на тэрыторыю Польшчы.

Szef MON poinformował, że polscy żołnierze wspierają Straż Graniczną

Twitter/@MON_GOV_PL

Высокапастаўлены супрацоўнік спецслужбаў Польшчы заявіў, што некалькі самалётаў з мігрантамі былі адпраўленыя назад з Беларусі ў Багдад ва ўмовах крызісу на знешняй мяжы Еўрапейскага Звязу.

«Пачаліся першыя эвакуацыйныя рэйсы Мінск-Багдад», – паведаміў прэс-сакратар міністра-каардынатара спецыяльных службаў Польшчы Станіслаў Жарын у твітэры ў аўторак, 2 лістапада. «Многія іракцы хочуць вярнуцца з Беларусі ў сваю краіну», – дадаў ён.

Станіслаў Жарын паведаміў польскаму інфармацыйнаму агенцтву PAP, што некалькі эвакуацыйных рэйсаў пакуль «не азначаюць прарыву», і цяжка прадказаць, што будзе адбывацца далей.

Тым часам, 3 лістапада часова паверанага ў справах Беларусі ў Польшчы Аляксандра Часноўскага выклікалі ў Міністэрства замежных спраў. Гутарка тычылася ўварвання на тэрыторыю Польшчы з Беларусі ў ноч з 1 на 2 лістапада неўстаноўленых людзей у форме, узброеных агнястрэльнай зброяй.

Беларускага дыпламата прыняў намеснік міністра Пётр Ваўжык. Намеснік міністра паведаміў, што накіруе ноту пратэсту ў МЗС Беларусі і заклікаў беларускі бок неадкладна растлумачыць інцыдэнт.

Пётр Ваўжык таксама выказаў рашучы пратэст супраць парушэння польскай дзяржаўнай мяжы, падкрэсліўшы, што дзеянні беларускіх уладаў у апошнія тыдні дэманструюць усё больш прыкмет наўмыснай эскалацыі.

Намеснік кіраўніка польскай дыпламатыі падкрэсліў, што такія дзеянні з'яўляюцца непрымальнымі і Польшча на іх не згаджаецца. Польскі дыпламат падкрэсліў, што Польшча настроеная абараняць свае ўласныя межы і межы Еўрапейскага Звязу.

Паводле паведамлення прэс-сакратара міністра-каардынатара спецслужбаў Станіслава Жарына, інцыдэнт адбыўся ўчора, 2 лістапада, прыкладна ў 1:45. Польскія жаўнеры заўважылі тады на сваёй тэрыторыі трох людзей у форме з доўгай зброяй. «Пасля спробы польскага патруля ўсталяваць кантакт, невядомыя перазарадзілі зброю, а затым накіраваліся ў бок Беларусі».

pap/iar/эж