У аўторак, 2 жніўня, пачалася прымусовая эвакуацыя тых жыхароў Данецкай вобласці, якія ўсё яшчэ знаходзяцца ў сваіх дамах. Прычына — няспынныя, інтэнсіўныя абстрэлы расіянамі гарадоў і вёсак. Аднак галоўная прычына — боязь, што зімой людзі могуць там проста замерзнуць.
У рэгіёне пашкоджаныя газаправоды. Некаторыя з іх пастаянна рамантуюцца, але ў выніку ваенных дзеянняў часта зноў пашкоджваюцца. Такім чынам, жыхары Данецкай вобласці гэтай зімой не могуць разлічваць на газазабеспячэнне сваіх дамоў, а значыць, і на ацяпленне.
З 24 лютага расійскае войска акрамя ваенных мэт наносіць удары па інфраструктуры Украіны. Гэта датычыцца не толькі прыфрантавых абшараў; практычна ва ўсіх рэгіёнах пашкоджаныя многія аб'екты энергетычнай інфраструктуры. Атакі былі накіраваны на нафтаперапрацоўчыя заводы, сховішчы нафтапрадуктаў, цеплаэлектрастанцыі, высакавольтныя лініі і трубаправоды. Расіяне захапілі найбуйнейшую ў Еўропе АЭС у Энергадары, знішчылі або захапілі тры ТЭЦ, чацвёртая, у Курахове, знаходзіцца ў непасрэднай зоне баёў.
Мэр Кіева Віталь Клічко ў канцы чэрвеня папярэдзіў жыхароў сталіцы, што ацяпляльны сезон у гэтым годзе будзе складаным і што трэба рыхтавацца да ніжэйшых за звычайныя тэмператур у кватэрах.
У яшчэ горшай сітуацыі апынуліся Мікалаеў і Харкаў — вялікія гарады, якія знаходзяцца пад пастаянным абстрэлам з-за блізкасці да лініі фронту.
Найбуйнейшая украінская інтэрнэт-крама Rozetka паведаміла, што ў ліпені продажы радыятараў выраслі ў дваццаць разоў. Па словах менеджараў, гэта беспрэцэдэнтная сітуацыя ў гісторыі крамы.
Страх перад суровай зімой апраўданы, бо большасць жылых дамоў савецкага часу не ўцепленыя. Па гэтай прычыне яшчэ ў даваенны час многія жыхары ацяплялі іх кандыцыянерамі або электраабагравальнікамі.
Многія задаюцца пытаннем, ці вытрымае энергасістэма Украіны ў такіх умовах.
Акрамя Запарожскай АЭС, украінцы страцілі тры цеплаэлектрастанцыі. Таксама расіяне ўзялі пад кантроль Кахоўскую ГЭС у Херсонскай вобласці.
Апроч таго на поўдні і ўсходзе краіны былі пабудаваныя вялікія ўстаноўкі ўзнаўляльных крыніц энергіі. Паводле ацэнак, расіяне захапілі або знішчылі 40 працэнтаў украінскіх сонечных і ветравых электрастанцый.
Што будзе з газам, невядома. Праўда, яго спажыванне скарацілася, у асноўным за кошт страты буйных прамысловых аб'ектаў (такіх, напрыклад, як два металургічныя заводы ў Марыупалі) і прыпынення вытворчасці на іншых.
Пакуль што станоўчы энергетычны баланс забяспечваюць электрастанцыі, у асноўным атамныя. Звязана гэта і з тым, што з вайной спажыванне электраэнергіі скарацілася амаль на 30%.
Нягледзячы на расійскую атаку, украінскую энергасістэму сёлета злучылі з еўрапейскай. У выніку з ліпеня краіна прадае значныя лішкі энергіі ў ЕС.
юл