Польская памежная служба гатовая прыняць магчымую другую хвалю бежанцаў з Украіны. Кожны ўкраінец, які шукае прытулку ў Польшчы, можа разлічваць на дапамогу, падкрэслілі польскія памежнікі з Медыкі і ўлады суседняга Пярэмышля.
У апошнія месяцы на памежных пераходах у Падкарпацці не было павышанага руху, як у першыя тыдні вайны, але польскія службы гатовыя да магчымага наплыву другой хвалі бежанцаў, кажа капітан Яцэк Шумэлда(Jacek Szumełda) з Бяшчадскага аддзелу памежнай службы:
- Зараз мы лепш падрыхтаваныя на выпадак, такіх ваенных дзеянняў, вынікам якіх была б хваля ўцекачоў. У нас досвед ужо ёсць. Таму зараз мы былі б больш разумнымі і лепш арганізаванымі, калі б нам давялося зноў прымаць сотні ці тысячы ўцекачоў з Украіны.
Да такой магчымасці падрыхтаваныя і прадстаўнікі самакіравання Пярэмышля, якія паклапаціліся пра адпаведную колькасць часовых месцаў для пражывання, пакеты першай дапамогі – лекі, ежу і цёплую вопратку.
IAR/аз