У польскіх універсітэтах больш за тысячу студэнтаў з Украіны вучацца дыстанцыйна на першым курсе ВНУ. Пра гэта паведамляе Канферэнцыя рэктараў акадэмічных школ Польшчы (KRASP). Гэта звязана з забаронай на выезд з краіны мужчынам ва ўзросце ад 18 да 60 гадоў.
Колькасць замежных студэнтаў у польскіх ВНУ сістэматычна расце. У гэтым навучальным годзе ў краіне навучаюцца каля 85 тысяч замежных студэнтаў. На працягу многіх гадоў самай вялікай групай замежных студэнтаў у Польшчы былі ўкраінцы. У 2021/22 навучальным годзе ў Польшчы вучыліся 36 011 украінцаў.
«У бягучым навучальным годзе больш за тысячу першакурснікаў з Украіны навучаюцца ў дыстанцыйнай форме па ўсёй Польшчы, у асноўным на польскай мове навучання. Гэта новая з'ява ў нашых універсітэтах. Раней усе замежныя студэнты, не лічачы перыяду пандэміі, прыязджалі да нас, вучыліся ў сценах універсітэта», – распавёў PAP старшыня Камісіі па міжнародным супрацоўніцтве Канферэнцыі рэктараў праф. Ежы Ліс, рэктарам AGH у Кракаве.
«Мы стараемся дапамагаць студэнтам з-за ўсходняй мяжы. Таму тыя, хто вучыцца дыстанцыйна, часта маюць індывідуальны курс навучання», – сказаў прафесар.
«Таксама ёсць група ўкраінскіх студэнтаў, колькасцю крыху больш за 200 чалавек, якія адразу пасля паступлення атрымалі акадэмічны водпуск у польскіх ВНУ, таму што не змаглі пакінуць сваю краіну. Напэўна, некаторыя з іх былі мабілізаваныя», – дадаў рэктар. Ва Украіне па-ранейшаму дзейнічае забарона на выезд мужчынам ад 18 да 60 гадоў.
Як студэнтам, якія вучацца ў Польшчы, так і ва Украіне, прапануюцца бясплатныя курсы польскай мовы. Зараз іх налічваецца 280. Большасць з іх стацыянарныя. У іх удзельнічаюць каля 5300 чалавек.
ав