Ва Украіне канфіскавалі 60 адзінак тэхнікі беларускіх дарожна-будаўнічых трэстаў. Размова пра каткі, бульдозеры, экскаватары ды іншую падобную тэхніку, якая належала трэстам № 2 (Гомель), № 4 (Берасце) і № 8 (Мінск). Іхныя працаўнікі ўдзельнічалі ў будаўніцтве ўкраінскіх дарог.
Агульны кошт канфіскаванай тэхнікі перавышае 7 мільёнаў долараў.
Канфіскацыю правялі ў межах крымінальнага расследавання фактаў крадзяжу дзяржаўных грошай, выдзеленых з бюджэту Украіны для будаўніцтва і рамонту дарог, а таксама з-за магчымай датычнасці да агрэсіі супраць Украіны.
За некалькі месяцаў да вайны стала вядома, што следчыя ўправы Нацыянальнай паліцыі Украіны ў Валынскай вобласці ўручылі галоўнаму інжынеру ТАА «Дарожна-будаўнічы трэст № 4» (Берасьце) Аляксандру Зарэцкаму падазрэнні ў прысваенні чужой маёмасці з выкарыстаннем службовага становішча, а таксама ў падробцы афіцыйных дакументаў.
З 2019 году ўправа Нацыянальнай паліцыі Украіны ў Жытомірскай вобласці расследуе справу аб магчымым раскраданні дзяржаўных грошай, вылучаных на рамонт і будаўніцтва дарог, падрадчыкам з Брэста – дарожна-будаўнічым трэстам № 4.
Паводле Радыё Свабода / вх