Расійскае ўварванне ва Украіну прывядзе ў гэтым годзе да голаду 40-50 мільёнаў чалавек, заявіў у пятніцу ў Берліне дзяржсакратар ЗША Энтані Блінкен. Адказнасць за гэта нясе толькі Расія, і харчовы крызіс нельга апраўдваць санкцыямі Захаду, падкрэсліў ён.
«Няма іншай прычыны, акрамя расійскай блакады Украіны і таго, што Расія ў многіх выпадках адмаўляецца ад экспарту ўласнага збожжа па палітычных матывах», – сказаў Блінкен на сумеснай прэсавай канферэнцыі з міністрам замежных спраў Германіі Аналенай Бэрбок.
У пятніцу ўрад Германіі арганізаваў міжнародную канферэнцыю, прысвечаную харчоваму крызісу, звязанаму з вайной ва Украіне.
Кіраўнік амерыканскай дыпламатыі падкрэсліў, што няма апраўданняў для стрымання адпраўкі важных тавараў на сусветныя рынкі. «Санкцыі, якія мы ўвялі супраць Расіі разам з многімі іншымі краінамі, не ахопліваюць прадукты харчавання, харчовыя тавары, угнаенні, страхавальнікаў і грузаадпраўшчыкаў», – адзначыў Блінкен.
ав