Цяпер ідуць кансультацыі па канкрэтнай фармулёўцы намінацыі. Хрысціянскія дэмакраты вылучылі «адважны народ Украіны ў асобе прэзідэнта Уладзіміра Зяленскага», сацыялісты і лібералы – народ Украіны, а кансерватары – прэзідэнта Уладзіміра Зяленскага.
Напад Расіі на Украіну, якая павінна была здацца за некалькі дзён, а потым гераічная барацьба ўкраінцаў з расійскім захопнікам, страты расіян, пакуты мірнага насельніцтва ва Украіне – усё гэта ўвайшло ў фільм, падрыхтаваны еўрапейскімі кансерватарамі, якія вылучылі прэзідэнта Украіны Уладзіміра Зяленскага на прэмію Сахарава.
«Прэміі патрэбны твар, і гэта сапраўдны твар украінскага супраціву несправядлівай агрэсіі Расіі – прэзідэнт, які натхняе ўсіх, хто змагаецца за справядлівасць, свабоду і суверэнітэт Украіны», – заявіў еўрадэпутат Яцэк Сарыюш-Вольскі.
Кандыдатуру хрысціянскіх дэмакратаў прадставіў Міхаэль Галер: «Адважны ўкраінскі народ, які прадстаўляе Уладзімір Зяленскі, – наша кандыдатура. Намерам Расіі было пазбавіць украінцаў лідара, а потым захапіць тэрыторыю, украінскі народ супрацьстаіць злу», – заявіў Галер.
Сацыялісты і лібералы падкрэслівалі ролю асобных людзей, прадстаўнікоў грамадзянскіх ініцыятыў, а таксама дзяржаўных і грамадскіх інстытутаў.
Сярод іншых намінантаў на прэмію гэтага года – палестына-амерыканская журналістка Шырын Абу Акле, якая на працягу 25 гадоў працавала на Al Jazeera і была застрэленая 11 мая 2022 года ў лагеры бежанцаў у Джэніне. Таксама намінантамі на прэмію Сахарава вылучаны аўстралійскі журналіст, інтэрнэт-актывіст, заснавальнік WikiLeaks Джуліян Ассанж, экалагічная актывістка і актывістка карэнных народаў Бразіліі, лідар альянсу карэнных народаў Соні Гуажажары і «Камісія праўды ў Калумбіі».
3 кастрычніка камітэты аб'явяць трох фіналістаў прэміі, 20 кастрычніка прэзідэнт парламента Роберта Мецола і лідары палітычных груп вызначаць пераможцаў, а 14 снежня ў Страсбургу адбудзецца цырымонія ўручэння.
IAR / Beata Płomecka / вх