Францыя створыць спецыяльны фонд для фінансавання закупак зброі для Украіны, заявіў прэзідэнт Францыі Эмануэль Макрон падчас нефармальнага саміту Еўрапейскай рады ў Празе. Ён таксама пацвердзіў, што ў бліжэйшы час Францыя прадаставіць Украіне дадатковую вайсковую тэхніку. Тэму працягвае карэспандэнт Польскага радыё Стэфан Фольцэр:
- Прэзідэнт Францыі паведаміў, што гэты фонд дазволіць украінскім уладам купляць абсталяванне ў французскіх вытворцаў. Паводле кіраўніка Францыі, спецыяльны фонд, які цяпер крэдытуецца не менш чым на 100 млн еўра, будзе фінансаваць закупку такой тэхнікі, якую Францыя да гэтай пары пастаўляла Украіне. Гэта будзе зброя аналагічнай катэгорыі, то бок абарончая. Макрон таксама пацвердзіў пастаўкі ва Украіну чарговых самаходных гаўбіцаў «Цэзар». Па гэтай справе вядуцца перамовы з Даніяй, якая скараціла свой заказ, каб новыя гарматы можна было перадаць Украіне.
IAR/сф/аз