Вайна ва Украіне – гэта таксама ваша праблема, таму што яна выклікае вялікую дэстабілізацыю ў свеце. Я заклікаю вас выступіць супраць гэтага, заявіў у пятніцу прэзідэнт Францыі Эмануэль Макрон лідарам саміту Азіяцка-Ціхаакіянскай эканамічнай супольнасці (АЦЭС) у Бангкоку.
«Першым прыярытэтам Францыі з'яўляецца ўклад у мір ва Украіне і спроба прымусіць свет аказаць ціск на Расію», – сказаў французскі лідар. Ён падкрэсліў, што яго краіна працягне дапамагаць Украіне.
Францыя таксама хоча вельмі цесна супрацоўнічаць з іншымі краінамі і рэгіёнамі, такімі як Кітай, Індыя, Блізкі Усход, Афрыка і Лацінская Амерыка, каб «стварыць усё большы кансэнсус» супраць расійскай агрэсіі, адзначыў Макрон.
«Дапамажыце нам накіраваць гэты мэсідж Расіі: спыніце вайну, паважайце міжнароднае права, вярніцеся да перамоваў», – заклікаў прэзідэнт Францыі.
Спасылаючыся на інда-ціхаакіянскія справы, Макрон заклікаў спыніць «супрацьстаянне» ў рэгіёне і адзначыў, што Францыя, якая мае там свае заморскія тэрыторыі, хоча адыгрываць у ім стабілізуючую ролю.
«Мы не верым у гегемонію, мы не верым у канфрантацыю, мы верым у стабільнасць», – падкрэсліў ён. Ён дадаў, што міжнароднае супрацоўніцтва мае важнае значэнне ў часы назапашвання крызісаў, і стратэгія Францыі ў Інда-Ціхаакіянскім рэгіёне – падтрымка «дынамічнага балансу» ў гэтых умовах.
Францыя не зʼяўляецца членам АЦЭС, якая аб’ядноўвае 21 краіну. Макрон прыехаў на бангкокскі саміт па запрашэнні гаспадара, прэмʼер-міністра Тайланда. Сярод гасцей сустрэчы – віцэ-прэзідэнт ЗША Камала Харыс, лідар Кітая Сі Цзіньпін і прэмʼер-міністр Японіі Фуміа Кісіда.
ав