Падрыхтоўка да гэтай сітуацыі ідзе, заявіў у пятніцу прэзідэнт Анджэй Дуда.
Падчас размовы ў рамках Кангрэсу 590 у Жэшаве прэзідэнт падкрэсліў важную ролю Падкарпацця ў аказанні дапамогі Украіне. «Падкарпацце спраўляецца са сваёй задачай у цяжкі час, калі сюды ўвесь час прыязджаюць бежанцы з Украіны. Падчас вайны ва Украіне, якая з'яўляецца вынікам нападу Расіі на гэтую краіну, Падкарпацце вытрымала выпрабаванне», – сказаў прэзідэнт.
Як дадаў Анджэй Дуда, праз Падкарпацце і Жэшаў пастаянна ідзе гуманітарная, матэрыяльная і ваенная дапамога для Украіны. Ён падкрэсліў, што апошнім часам «энергетычная інфраструктура Украіны была жорстка разбурана і знішчана расіянамі». «У многіх выпадках украінцам не будзе чым ацяпляць свае дамы, у іх не будзе гарачай вады. Верагодна, новая хваля бежанцаў пацячэ ў Польшчу. Зараз у нас ідзе падрыхтоўка. Я размаўляў пра гэта з маршалкам Падкарпацкага ваяводства Уладзіславам Ортылам», – сказаў прэзідэнт.
Ён падкрэсліў, што польская дзяржава павінна функцыянаваць нармальна. «Той факт, што грамадства, мясцовы бізнес і ўлады прайшлі выпрабаванне, вельмі важны і паказвае іх адказнасць», – дадаў прэзідэнт Дуда.
За апошнія тыдні расійскія войскі істотна актывізавалі абстрэлы энергетычных абʼектаў Украіны. Украінскія палітыкі і СМІ падкрэсліваюць, што краіна рыхтуецца да цяжкай зімы і сурʼёзнага энергадэфіцыту. На іх думку, абстрэлам украінскай грамадзянскай інфраструктуры Крэмль спрабуе выклікаць гуманітарную катастрофу і справакаваць новую хвалю бежанцаў у краіны Еўропы.
Як падкрэсліваюць эксперты, атакі на грамадзянскія абʼекты зʼяўляюцца ваенным злачынствам у адпаведнасці з міжнародным правам, а знішчэнне энергетычнай інфраструктуры не мае ваеннага апраўдання.
ав