Галоўнакамандуючы Збройных сілаў Украіны Валерый Залужны паведаміў 6 лістапада пра смерць свайго памочніка, маёра Генадзя Часцякова. У час святкавання Дня народзінаў спрацавала выбуховая прылада ў адным з падарункаў, сцвярджае Залужны.
Як напісаў Валерый Залужны, ягоны памочнік і блізкі сябра Генадзь Часцякоў загінуў у свой дзень народзінаў, «у адным з падарункаў спрацавала невядомая выбуховая прылада». У Часцякова засталіся жонка і чацвёра дзяцей.
Іншыя крыніцы не называлі прычынаў смерці Часцякова, сам Залужны адзначыў, што прычыны і абставіны смерці яшчэ будуць высвятляць у дасудовым расследаванні.
Як піша «Українська правда» са спасылкай на ўласныя крыніцы, загінулы – той самы 39-гадовы вайсковец, аб смерці якога паведамлялі раней у Міністэрстве ўнутраных справаў. Пра той выпадак казалі, што ў сяле Чайкі на Кіеўшчыне мужчына загінуў удома ад неасцярожнага абыходжання з боепрыпасамі, а ягоны 13-гадовы сын цяжка паранены і шпіталізаваны.
«Еспресо TV» сцвярджае, што жонка загінулага казала: выбух адбыўся, калі адкрывалі адзін з падарункаў, у скрынцы мелі быць бутэлька алкаголю і чаркі.
яс/belsat.eu