– Я дагэтуль не магу прыйсці ў сябе, – паведаміла Польскаму радыё Караліна Каміньска, жыхарка Саўтпорту, якая мае салярый побач з месцам здарэння.
Зламыснік зайшоў у мясцовы Дом культуры, дзе праходзілі заняткі для дзяцей, і пачаў наносіць удары нажом.
«З вялікім сумам я паведамляю, што двое дзяцей загінулі ў выніку раненняў, атрыманых раніцай», – заявіла Серэна Кенэдзі з паліцыі Мерсісайда.
«Мы мяркуем, што пацярпелыя дарослыя мужна спрабавалі абараніць дзяцей ад нападу», – дадала прадстаўніца паліцыі. Яна падкрэсліла, што як маці і бабуля «не можа нават уявіць, якія пакуты цяпер перажываюць семʼі загінулых».
Раней па справе быў затрыманы 17-гадовы падлетак. На дадзеным этапе следства не разглядае здарэнне як тэрарыстычны акт. Міліцыя звяртаецца да грамадзян з просьбай пазбягаць здагадак аб абставінах трагедыі на ранніх стадыях расследавання.
«Мы з жонкай глыбока шакаваныя паведамленнямі аб жудасным інцыдэнце ў Саўтпорце», – так адрэагавалі на напад у сваёй заяве кароль Карл III і яго жонка каралева Каміла.
Кароль выказвае «шчырыя спачуванні ад сэрца, малітвы і глыбокае суперажыванне» сваякам загінулых.
Інцыдэнт адбыўся перад поўднем па мясцовым часе 29 ліпеня. Мясцовыя жыхары падкрэсліваюць, што гэта ціхае месца, дзе ёсць возера, пляж. Таксама шмат дамоў састарэлых.
Паводле IAR/вх