Інстытут нацыянальнай памяці (ІНП) Польшчы адрэагаваў на абвяшчэнне ўладамі Беларусі новага свята ў гадавіну агрэсіі Савецкага Саюза супраць Польшчы, чытаем на партале dzieje.pl.
«17 верасня 1939 года Сталін выканаў абавязацельствы перад Гітлерам паводле таемнага пратакола да пакту Молатава-Рыбентропа. Агрэсія Чырвонай Арміі дазволіла германскаму Рэйху паскорыць акупацыю Польшчы. 17 верасня 1939 года, быў і застанецца сімвалам злачыннага хаўрусу Гітлера і Сталіна, накіраванага супраць свабодных народаў Еўропы», – гаворыцца ў афіцыйнай заяве Інстытуту нацыянальнай памяці Польшчы.
«Дэманстрацыяй дружбы абодвух агрэсараў стаў сумесны нямецка-савецкі парад у Брэсце. Нямецка-савецкае супрацоўніцтва прынесла паняволенне мільёнам грамадзянам Польшчы – у тым ліку прадстаўнікоў нацыянальных меншасцяў. Чарговым наступствам агрэсіі СССР супраць Польшчы стала пазнейшае паняволенне іншых дзяржаў і рэгіёнаў», – адзначылі ў ІНП, дадаўшы таксама, што германскі Рэйх і Савецкі Саюз пачалі на акупаваных землях палітыку рэпрэсій, злачынстваў і генацыду.
«Абвяшчэнне гадавіны 17 верасня 1939 «Днём народнага адзінства Беларусі» абражае памяць не толькі польскіх, але і беларускіх ды іншых ахвяр абедзвюх таталітарных сістэм. Па сутнасці, 17 верасня 1939 года – гэта «Дзень адзінства двух таталітарызмаў», – рэзюмавалі гісторыкі Інстытуту нацыянальнай памяці Польшчы.
У 2021 годзе мінае 82 гады з моманту агрэсіі Савецкага Саюзу на Польшчу, у выніку якой польская дзяржава назаўжды страціла ўсходнія межы – у тым ліку Віленшчыну, Наваградчыну, Заходняе Палессе, Валынь і частку Усходняй Галіцыі, уключаючы Львоў і Львоўскае, Цярнопальскае і Станіслаўскае ваяводствы. Чырвоная Армія, уступіўшы 17 верасня 1939 года на тэрыторыю Другой Рэчы Паспалітай, ажыццявіла таемнае пагадненне з трэцім германскім Рэйхам, што ў канчатковым выніку прывяло да падзелу Польшчы. Пра рэакцыю польскага ІНП на ўстанаўлення рэжымам Лукашэнкі чарговага так званага свята пісалі на партале dzieje.pl.
эж