Кэці Маккуі і Мэй-Лінг Макнамара (Katie McQue і Mei-Ling McNamara) прыйшлі да высноў, што сацыяльныя сеткі Facebook і Instagram сталі не толькі месцам продажу парнаграфіі з удзелам непаўналетніх, але і сапраўдным рынкам гандлю дзецьмі, які з кожным годам расце. Праз сацсеткі сутэнёры знаходзяць сваіх ахвяр, маніпулююць імі, а затым прымушаюць іх займацца прастытуцыяй.
Ужо ў 2019 годзе Брытанскае нацыянальнае таварыства па перадухіленні жорсткага абыходжання з дзецьмі апублікавала справаздачу, якая паказала, што ажно 70 працэнтаў з выпадкаў грумінгу, прааналізаваных арганізацыяй, адбываліся праз сацыяльныя сеткі. Праз год праблему даследавалі амерыканцы. Паводле справаздачы супрацоўнікаў амерыканскага Інстытута барацьбы з гандлем людзьмі, Facebook быў платформай, якую злачынцы найбольш частка выкарыстоўвалі для спакушэння і вярбоўкі дзяцей. Другі - Instagram, трэці ў гэтай ганебнай канкурэнцыі апынуўся Snapchat. Усе тры належаць лічбаваму гіганту – Meta.
Здавалася б, паколькі праблема была заўважана, выяўлена і даследавана, Meta прыме адпаведныя меры, каб ліквідаваць яе раз і назаўжды. Здавалася б, у кампаніі ёсць патрэбныя інструменты, каб не толькі блакаваць усіх педафілаў і гандляроў дзецьмі, але і перадаваць іх праваахоўным органам. Хоць інтэрнэт-гігант не адмаўляе праблемы і спрабуе з ёй змагацца, эфектыўнасць пакідае жадаць лепшага. Чаму так? У пошуках адказу на гэтае пытанне журналісты апыталі больш за семдзесят чалавек, якія ўдзельнічаюць у гэтай справе: ахвяраў, сваякоў ахвяраў, пракурораў, медыцынскіх работнікаў і мадэратараў кантэнту ў сацыяльных сетках у Злучаных Штатах.
Пракуроры, якія ўдзельнічалі ў барацьбе з гандлем дзецьмі, сказалі, што з усіх сацыяльных сетак Facebook і Instagram часцей за ўсё выкарыстоўваюцца сэксуальнымі злачынцамі, якія эксплуатуюць непаўналетніх. Іншая рэч, якая адрознівае платформы, якія належаць Meta, – гэта тое, што яны павольна супрацоўнічаюць з паліцыяй. Па словах суразмоўцаў журналістаў, кампанія часта тармазіла расследаванні, спасылаючыся на недарэчныя тэхнічныя дэталі.
Кампанія Meta прызнае, што гандляры дзецьмі выкарыстоўваюць яе платформы, але падкрэслівае, што робіць усё, каб перадухіліць гэта. На абвінавачанні пракурораў адназначны адказ – што яны беспадстаўныя. Са студзеня па верасень 2022 года, Facebook паведаміў пра больш чым 73,3 мільёна фактаў кантэнту (пастоў, фота і запісаў) педафільнага характару, а Instagram – каля 6 мільёнаў. З 34 мільёнаў фактаў выдаленага кантэнту з сексуальным гвалтам над дзецьмі 98% было выяўлена самой Meta.
З 2009 па 2019 год Meta паведаміла толькі пра тры выпадкі падазрэння ў гандлі дзецьмі сексуальнымі мэтамі ў Злучаных Штатах, згодна з запісамі, апублікаванымі ў запыце на позву, атрыманым Guardian. Па словах Стакі Шэнан, віцэ-прэзідэнта аддзела аналітычных службаў Нацыянальнага цэнтра зніклых і эксплуатаваных дзяцей, некамерцыйнай арганізацыі, галоўным фундатарам і акцыянерам якой з'яўляецца Meta, праблема звязана з дзвюма прычынамі: юрыдычнай і тэхналагічнай. У адрозненне ад адкрытага зместу дзіцячай парнаграфіі, не існуе юрыдычнага абавязацельства паведамляць аб гандлі дзецьмі. Да таго ж апошнія значна складаней выявіць.
Meta выкарыстоўвае як праграмнае забеспячэнне, так і каманды мадэратараў для выяўлення незаконнага кантэнту. Журналістам Guardian удалося паразмаўляць з некалькімі з іх. Аднаму з іх суразмоўцаў было даручана праглядаць размовы паміж дарослымі і дзецьмі ў мэсэнджарах Facebook, якія раней былі пазначаныя як падазроныя праграмным забеспячэннем AI Meta.
Мадэратары адзначылі, што калі незаконны кантэнт размяшчаецца ў закрытых групах Facebook або рассылаецца праз Messenger, выдаліць яго складаней. Адзін з кіраўнікоў каманды нават заявіў, што паведамленні, адпраўленыя праз Messenger, павінны быць літаральнымі і відавочнымі, каб з гэтым нешта зрабіць. Так што зламыснікам дастаткова ўжыць невідавочную абрэвіятуру або сінонім, і рукі мадэратараў аказваюцца звязанымі.
На гэтыя сцвярджэнні прэс-сакратар Meta адказаў, што яны «ўводзяць у зман і недакладныя», бо мадэратараў не інфармуюць аб тым, што адбываецца з заяўленым кантэнтам. Акрамя таго, па словах прэс-сакратара, кампанія выкарыстоўвае тэхналогію для пошуку кантэнту, што мае адценне сексуальнай скіраванасці на дзяцей, у прыватных групах у Facebook і Messenger.
Люк Голдварм, былы памочнік акруговага пракурора ў Бостане, які на працягу многіх гадоў займаўся расследаваннем спраў аб гандлі людзьмі, распавёў Guardian, што з 2019 па 2022 год колькасць спраў у аддзеле барацьбы з гандлем дзецьмі ў сацыяльных сетках павялічылася на 30% у гадавым вылічэнні. На яго думку, у інтэрнэт пераходзіць усё больш людзей з крымінальным мінулым – іх спакушае і заробак, і, здаецца, бяспека. Бяспека для сексуальных злачынцаў, а не карыстальнікаў. І ўжо дакладна не для дзяцей.
Паводле forsal.pl / вх