За тры гады гэтай жорсткай вайны рэжым Пуціна канфіскаваў прыватную маёмасць на суму не менш за 50 мільярдаў долараў, што эквівалентна адной траціне гадавога ваеннага бюджэту Расіі. Гэта адбываецца пад лозунгам «нацыяналізацыі» з мэтай атрымання сродкаў для вядзення злачыннай вайны, піша Івона Трусевіч у газeце Rzeczpospolita.
Бізнес і маёмасныя правы безабаронныя перад расійскай дыктатурай
Эксперты неаднаразова адзначалі, што бізнес і маёмасныя правы безабаронныя перад расійскай дыктатурай, якая можа ліквідаваць любую кампанію. Каб праілюстраваць маштаб рабавання Крамлём прыватных актываў, юрысты юрыдычнай фірмы «Нектараў, Савельеў і партнёры» адзначаюць, што канфіскаваная маёмасць перавышае гадавы бюджэт Санкт-Пецярбурга больш чым у 2,5 раза (прыкладна 1,5 трыльёна рублёў), а бюджэты буйных рэгіёнаў, такіх як Новасібірск (374 мільярды рублёў) і Растоўская вобласць (363 мільярды рублёў), больш чым у дзесяць разоў.
Колькасць канфіскацый працягвае расці, паколькі рэжым захоплівае кантроль над стратэгічнымі прадпрыемствамі, неабходнымі для ваенных дзеянняў. Продаж нацыяналізаваных аб'ектаў часткова кампенсуе бюджэтны дэфіцыт, узнагароджвае звязаных з Крамлём бізнесменаў і робіць пакупнікоў залежнымі ад рэжыму.
Расійскія суды залежаць ад Крамля
Службы бяспекі актыўна шукаюць магчымасці для захопу, у чым ім дапамагаюць суды, падпарадкаваныя Крамлю, у тым ліку Канстытуцыйны суд, які адмяніў тэрмін даўнасці па прыватызацыйных здзелках. Гэта дазволіла канфіскаваць актывы нават у справах, якія датуюцца 1990-мі гадамі.
Псеўданацыяналізацыя прымае розныя формы
Напрыклад, дыктатар сваім указам перадае прадпрыемствы замежных інвестараў, абароненыя міжнароднымі дамовамі, Федэральнаму агенцтву па кіраванні маёмасцю для «бестэрміновага кіравання». Паводле звестак Rzeczpospolita, колькасць такіх аб'ектаў за апошні год складае 16.
Афіцыйныя прычыны канфіскацый:
• карупцыя – 1,07 трыльёна рублёў
• парушэнні прыватызацыі – 385,4 мільярда рублёў
• неэфектыўнае кіраванне і кантроль – 621,5 мільярда рублёў
• барацьба з экстрэмізмам – 181,8 мільярда рублёў
Большасць судовых працэсаў праходзяць за зачыненымі дзвярыма, што яшчэ больш падрывае давер да прадстаўленых доказаў.
Новыя ўладальнікі не спраўляюцца з кіраваннем
Паводле эканаміста Андрэя Якаўлева з Цэнтра Дэвіса Гарвардскага ўніверсітэта, з эканамічнага пункту гледжання праграма неэфектыўная, бо канфіскаваная маёмасць усё яшчэ патрабуе манетызацыі. У мінулым годзе продаж «нацыяналізаванай» маёмасці прынёс у бюджэт толькі 132 мільярды рублёў. Гэта складае ўсяго 1,2%ваенных выдаткаў.
Замена вопытных кіраўнікоў асобамі, якія залежаць ад дзяржавы, зніжае эфектыўнасць эканомікі. Прыкладам можа служыць французская кампанія Danone, якая трапіла ў рукі сям'і Рамзана Кадырава і, нягледзячы на сваё дамінуючае становішча на рынку малочнай прадукцыі, працягвае павышаць цэны, быццам не ведае іншых механізмаў павышэння эфектыўнасці.
Юрысты раяць
Каб абараніць сябе ад страты маёмасці, юрысты «Нектараў, Савельеў і партнёры» раяць расійскім уладальнікам бізнесу пазбавіцца ад усяго, што можа паслужыць падставай для захопу іх бізнесу, то бок другога грамадзянства, нерухомасці за мяжой, дзелавых сувязяў з недружалюбнымі краінамі, а таксама разгледзець магчымасць перадачы сваёй долі «арыентаваным на дзяржаву» партнёрам.
Ёсць і іншы варыянт: эміграцыя. Але куды? Ніхто не хоча жыць у Паўночнай Карэі, Іране ці Венесуэле, і колькасць месцаў у свеце, дзе расіян, нават тых, хто мае значны капітал, вітаюць, змяншаецца.
яс